XXV Certame de Pintura Nicanor Piñole

L'artista  Alberto Ámez resultó ganador nel XXV Certame de Pintura Nicanor Piñole cola obra "Águila negra. Camino del Puerto. Juegos Olvidados" , escoyida por un xuráu espertu d'ente los 15 cuadros colos que s'acaba d'inaugurar l'habitual esposición conmemorativa, na Casa de la Mocedá, d'ente les 239 creaciones que se presentaron a concursu.
El cuadru ganador, destaca'l xuráu, "sigue la estela de la pintura gótica y de pintores flamencos como Joachim Patinir". L'artista, añede,"ye un gran pintor d'escenes nes qu'asoceden munches coses, que nun ye necesariu entender racionalmente y que les pinta ensin esfuerzu aparente con gran dominiu del llinguaxe pictóricu".
Alberto Ámez, nacíu en Xixón, ye un célebre artista asturianu que recibió otros galardones importantes como'l del Certame Nacional d'Arte de L.luarca, y cuenta con un estensu y prestixosu currículu artísticu. Ésta ye la so primer participación nel Certame Nicanor Piñole.
"Águila Negra", que pasa a formar parte de los fondos pictóricos del Conceyu, va poder vese hasta'l 17 de xunu, xuntu a una muestra de les meyores obres presentaes al certame, na Casa de la Mocedá, en Sotrondio, n'horariu de mañana y tarde, de llunes a vienres.
El xuráu del Piñole tuvo compuestu pol artista Juan Fernández Alba y los críticos y comisarios de arte Natalia Alonso Arduengo y Pablo Rodríguez Fernández de la Vega.
Les obres presentaes a concursu tuvieron procedencies diverses, de toles comunidaes autónomes y de países como México, Arxentina, Suiza, Italia, Francia, Portugal o Croacia.
Per otra parte, nesta edición recupérase la categoría escolar, suspendida na anterior convocatoria por cuenta de la pandemia, con participación del alumnáu d'Educación Infantil, Primaria y Secundaria.
La entrega del premiu a la categoría llibre, valoráu en 1.500 euros, y los premios escolares, un total de 31, va tener llugar el 17 de xunu, a les 18 hores, na Aula Cultural "Onofre Rojo", en Sotrondio.