Trassg na Corte del Rei Aurelio

Esisten lleendes que falen de llugares onde queda l'alcordanza de quienes ellí vivieron, de los qu' en dalgún momentu ellí tuvieron y que, con sólo facer un esfuerzu, detenese un pocu y abrir tolos sentíos, puede sentise la so presencia.

Eso-y pasó a Trassg namás adientrar pela viesca del antiguu territoriu del rei Aureliu. Al so pasu los recuerdos revivieron nes sendes qu'atravesó, tresformándose nun remolín de colores, verde, azul, negru, marrón, mariellu y pincelaes ocres que xiraron nel so celebru al caleyar per praos, ríos, regatos, árboles y arbustos. Con una banda sonora bombeándo-y 'l corazón, alternando los sos llatíos col marmullu de l'airín colándose ente les fueyes de los carbayos, rebollos, castañales, fayes, abedules, umeros, fresnos, salgueros, manzanales, carrascos, ablanales onde s' escuenden cuquiellos, curuxinos, parpayueles, peguetes, picafayes, picatueros, xingalraos, llavanderes, cerriques, rulles, palombos, raitanes, miruellos, malvises, charretes, pioyinos, papudes, papoxes, mosqueros, ferrerinos, esguilones, raullargos, escribanos, xilgueros, pardinos, picabrotos, gurriones, glayos, pegues, cuervos, verderinos y verderones que colos sos trinos ruempen el suave cantu del ríu baxando 'l valle. Too ello llama a Trassg a siguir l' ascensu como cantu de xana a quien acompañen nes agües un séquitu de garcies riales, coríos, verderríos, llavaculos, truches, fuines, melandros , xinetes , sapos y ranes que suañen con príncipes y princeses. Ellí onde 'l rei Aurelio paseó 'l so heredáu tronu como rei d' Asturies y Trassg lu presiente al llau del camín, al acechu la caza, siguiendo 'l rastru de xabalís y corzos mientres escapen el llubu y el raposu.

Trassg escucha cantos de xana que falen de romances, trasgos, nuberos, diaños y cuélebres contaos nes antoxanes, nos corredores de les cases dende les que se ve'l valle y sobre les que'l curuxu y la curuxa marquen el pasu de los díes y les andarines anuncien el cambiu d' estación al tiempu que nos campos broten les flores y les abeyes pónense a plenu rendimientu enllenando l' aire de néctar y de polen.

Nel so caleyar Trassg atópase con cuentos depositaos a les puertes de los molinos onde los pequeños regatos tresfórmense en canales bravíos, enllenos d'enerxía, que convierten les estremaes pieces del molín n' instrumentos musicales. Peculiar orquesta que fae de los granos fariña, nun máxicu itinerariu per tremoria, escorniellu, güeyu, muela, frayón, escornellón y banzal, hasta llegar a les macones y entamar otra vegada'l so viaxe vieyes histories cuntaes en díes d' orbayu y ñebla. Onde una canción suena llonxe, camudándose en tonada, confundiéndose ente les esquiles del ganáu que caricia los inclinaos praos y recuerda a quienes durante tantos años pasaron per caminos y caleyes p' adientar nes entrañes de la tierra y onde Trassg alcuentra pontes, pozos, bocamines.

Rises y cantares surden de los caños de los antiguos llavaderos onde les muyeres compartieron llabores, penes y allegríes delles vegaes interrumpíes pol repiquetear de les campanes, el turullu de la mina o l' allegre soníu de la gaita y los volaores.

Dende los cumales, cualquiera d' ellos, la Colladiella, Campa Cimera, Picu Tres Conceyos, Trassg siéntese como la zapiquera, el pardón , el ferre o l' utre qu'aporta dende les cercanes montañes de Redes y Peña Mayor o les mas alonxaes del Sueve, o los Picos d' Europa y esperimenta la satisfaición de sobrevolar el tarrén percorríu, los valles, cordales y montañes, de recordar fábules, mitos, tradiciones, de sentir l' arume y los soníos de la vexetación, la flora y la fauna que lu vixiló nel so percorríu y que lu invita otra vegada a entamar el camín, a somorguiase nes nueves sensaciones, a percibir les sorpreses que pa los sos pasos guarda'l territoriu del rei Aurelio.

Y como si viaxaren nel tiempu clarines y timbales óyense na llexura, la Corte del Rei Aurelio ábrese pasu ente les filaes de moros y cristianos que lu acompañen.Trassg entaína y con curiosidá avérase onde la xente p' agüeyar lo que pasa...