Torrevieja
La ciudá de Torrevieja ye llugar máxicu pa los asturianos y bien especialmente los del Valle del Nalón , pos son munchos los asturianos qu'ellí tienen la so segunda residencia.
En feches como estes nada meyor qu'empezar la visita a Torrevieja nel Muséu del Mar y del Sal, muséu matriz que coordina la rede museística de Torrevieja. Ellí empezamos apreciando les pieces arqueolóxiques atopaes na mariña alicantina al pie de distintos elementos nos que s'espliquen ya ilustren les xeres del mar y del sal, amás de maquetes d'edificios, barcos y singulares embarcaciones feches polos maestros artesanos nes salines.
D'esti muséu vamos al puertu de Torrevieja pa visitar el complexu cultural que más ésitu tien ente los turistes y sobremanera los más nuevos. Trátase del Muséu Flotante de Torrevieja formáu por trés embarcaciones, el Submarín S-61 Delfín , la Patrullera de Vixilancia Aduanera Albatros III y el Pailebote Pascual Flores.
Estes trés embarcaciones tán íntimamente amestaes cola ciudá por distintos motivos. El submarín S-61 foi'l primer buque de l'Armada Española que se convirtió en muséu flotante, precisamente na ciudá que-y otorgó la so bandera de combate nel añu 1971. La Patrullera Albatros III perteneció al Serviciu de Vixilancia Aduanera hasta'l 23 de marzu de 2006, cuando foi acoyida por Torrevieja como'l so segundu muséu flotante. Y el Pailebote Pascual Flores ye una reconstrucción de la embarcación orixinal qu'usaben los marineros torrevejenses pa comerciar el sal y que foi recuperada en Londres pela ciudá alicantina.
Magar Torrevieja ufierta la posibilidá de visitar otros centros museísticos como'l Muséu de la Selmana Santa, el de Los Belenes o'l Muséu d'Hestoria Natural, la visita puede rematar nel Muséu de Les Habaneres , dedicáu al compositor torrevejense Ricardo Lafuente Aguáu, nel que s'atopen distintos oxetos ,preseos y partitures que recuerden la vida y obra del músicu que fixo de Torrevieja Capital de L'Habanera ; un recursu turístico y cultural en redol a la música que favorez el desenvolvimientu d'actividaes a lo llargo de too l'añu.
Torrevieja ufierta muncho más que sablera y sol, rutes y senderismu pola mariña , pol Parque Natural de Les Llagunes d'El Matu y Torrevieja, la Paraxa Natural Parque del Molín d'Agua o l'interesáu Parque Arumosu del Ribayu de Torreblanca diseñáu pola arquiteuta Carmen Pinós . Pero sobremanera actividaes culturales pa tolos gustos,si en mayu celebra la Feria de Mayu qu'axunta en redol a variopintes casetes allugaes nel puertu a más trescientos mil festeros al estilu de la Feria d'Abril sevillana,con actuaciones de baille al cargu de los alumnos de la escuela de danza municipal y academies locales, actuaciones d'importantes grupos rocieros y exhibiciones d'adomadores de caballos, gabites y carruaxes y degustaciones de productos típicos, mientres los primeros díes d'avientu'l protagonismu ye del Centru Asturianu que tradicionalmente celebra la festividá de Santa Bárbara, nesta ocasión dedicando la celebración al Conceyu de Samartín del Rei Aurelio que va recibir la insinia d'oru del centru, onde les actuaciones folklóriques y la degustación de sidra y productos típicos enllenarán d'asturianía les cais de Torrevieja.