SOMAO

Esti sábadu 17 d'iochobre la parroquia rural de Somao en Pravia recibirá'l Premiu al Pueblu Exemplar d'Asturies 2020 , la concesión d'esti galardón fae que seyan munches les persones que s'acerquen a los pueblos pa conocelos.

Enclavada nel mediu xeográficu del baxu Nalón, nuna contorna de transición ente árees rurales y urbanes, la parroquia rural de Somao marca'l puntu más septentrional del conceyu de Pravia, ente que eclesiásticamente pertenez al de Muros de Nalón. La localidá ta asitiada nun altu con vistes al mar y a la desembocadura del ríu Nalón. Con unos trescientos habitantes na actualidá, Somao ye una de les trenta y nueve parroquies rurales qu'hai n'Asturies con personalidá xurídica propia y con capacidá pa xestionar y entamar los sos bienes, ente los que s'atopen unes cuatrocientes hectárees de monte y dellos pacionales, que son una importante fonte d'ingresos pal pueblu, xunto a otros procedentes del arriendu de delles cases y la xestión del chigre del centru social. La parroquia tuvo rexida ente 2015 y 2019 por una xestora ensin signu políticu, formada dempués de la dimisión del anterior alcalde pa caltener el so estatus xurídicu y evitar que los sos bienes pasaren a ser propiedá del Conceyu de Pravia. Tres les elecciones municipales de 2019, la xunta escoyida ta formada polos integrantes de l'anterior xestora.
El pasáu de Somao ta amestáu a la hestoria de la emigración y cuenta con un patrimoniu arquitectónicu d'orixe indianu de notable valor. Pero amás de los destacaos palacetes d'esta dómina -dalgunos d'ellos obra del arquiteutu Manuel del Bustu-, el pueblu tamién se benefició porque los indianos invirtieron na trayida d'agua, caminos y fontes y financiaron la construcción d'edificios públicos, como les escueles (1925), el cine escolar benéficu (1920) y l'ilesia (1903), amás del parque de la localidá. El legáu indianu convive coles construcciones típiques asturianes, como horros, paneres y payares, siendo la quintana o casería'l tipu de construcción que muestra un pasáu agrariu vinculáu a la esplotación del campu y la ganadería.