Senda Parque d'Iviernu,Fuso de la Reina,Les Caldes
Creóse esta senda verde pa la reutilización del trazáu por onde circulaba l'antiguu ferrocarril que xunía Uviéu con Fuso de la Reina. Una senda que llegó a convertise n'una de les más transitaes y con más ésitu ente caminantes, ciclistes ya inclusive patinadores ; yá que atoparon nella una curiosa ruta onde paisaxe, fauna y flora xúnense pa ufiertar un itinerariu entreteníu y de bon accesu.
Los diversos elementos que s'atopen a lo llargo del so trayectu, pontes,pasareles y túneles colos que l'itinerariu abre pasu ente'l monte y sobro los ríos, son de gran entretenimientu pa neños y neñes y contribúin a qu'esta pequeña ruta, d'apenes diez kilómetros, resulte amena y paeza entá más curtia.
El percorríu empieza nel Parque d'Iviernu n'Uviéu, al llau de la fundación Masaveu. En travesando esti parque ente un monte autóctonu de castañales,fayes y abedurios llégase a l'antigua estación de Feve en La Manjoya, onde s'atopa un Aula de la Naturaleza .
A lo llargo de la ruta tópense dellos espacios y árees recreatives onde puede parase a folgar. Siguiendo'l trayectu pola sienda, escontra la metá de la mesma a unos 4 km , alcuéntrase l'encruz Ayones-Llagú.
La senda sigue'l trazáu del ríu Gafu y nel so enfotu por non perdelu de vista va travesar el monte al traviés de dellos túneles, El Molineru, Mergullu, Premaña y Veneros.
Una vegada travesáu'l túnel de Premaña llega la senda hasta les inmediaciones de les instalaciones de Golf de les Caldes y equí puede optase por dir hasta Les Caldes bordiando'l campu de golf o travesar l'últimu túnel, Veneros, que lleva a la estación de Feve en Fuso de La Reina dempués de pasar pol gran viaductu que crucia'l ríu Nalón. Equí atópase'l entronque del trazáu coles llínees de ferrocarril de Collanzo y Pravia.
Dende Fuso de la Reina sigue la senda escontra la Central Hidroeléctrica de Puertu con dirección escontra Les Caldes siguiendo'l calce del ríu Nalón que se pasa al traviés d'una gran ponte colgante. Nesti tramu la marcha acompaña al ríu Nalón so la vexetación d'un monte de ribera, hasta llegar frente al Castiellu de Priorio. Nesti puntu la mayoría de los caminantes opten por averase a Les Caldes y dempués empecipiar l'itinerariu de regresu a Uviéu , travesando la localidá hasta llegar a un parque de transición onde se dexa atrás el cascu urbanu y encamínense los pasos ente árboles y pontes de madera sobro pequeños regueros qu'enllenen de murmuriu la travesía. De nuevu nel campu de golf xúbese bordiándolu hasta enllazar otra vegada col vieyu trazáu ferroviariu convertíu en senda verde.
Quien dispón de más tiempu o fuerces tien la opción de siguir hasta'l pueblu de Caces y en pasando xuntu al edificiu de la so antigua estación, siguir escontra Trubia pa enllazar cola Senda del Osu.
