Sablera del Espartal o San Juan de Nieva

La Sablera del Espartal o San Juan de Nieva atópase nel conceyu de Castrillón, l'arenal ye l'allongamientu de la sablera de Salinas y ocupa'l tramu costeru que va dende la área de servicios del Puertu d'Avilés asitiáu sobre la marxe esquierda de la Ría, a l'área urbana de la localidá de Salinas.

Tien un aparcamientu pergrande que facilita l'accesu a numberosos coches y amás ta mui cerca de la estación de RENFE de San Juan de Nieva, lo que facilita 'l desplazamientu de xóvenes de la contorna y del restu d'Asturies pa bañase o facer surf.

Con unos 500 metros de llargor, tien l'espaciu suficiente p'acoyer col distanciamientu necesariu a los bañistes nestos tiempos de branu de Covid-19 y permite'l paséu pel sable, sobre too cola marea baxa.

Ye un entornu con gran valor ecolóxicu, ya que tres la sablera hubo n'otres dómines el  campu dunar más estensu d'Asturies, de casi un kilómerto d'anchor. Anguaño, el sistema dunar del Espartal presenta una primera llínea de dunes, d'hasta quince metros d'altor, tres el que s'asitia un estensu campu dunar en recuperación.