Prerrománicu del Naranco

Cola llegada de la primavera la fastera del Naranco empieza a enllenase de caminantes y ciclistes , o de quien más perezosos o con menos fuerces deciden averase alredor los edificios prerrománicos pa esfrutar del paisaxe o la tranquilidá de la llectura mientres Vetusta duerme a los sos pies.
Y lo de dormir ye una cenciella metáfora pues a pocu que se mire vese'l tráficu qu'enllena les cais y aldovínase 'l traxín ente los edificios que fueron estendiéndose pola antígua capital del Reinu Astur. Unes vistas perdistintes a les que'l monarca Ramiro I tendría cuando decidió construyir el so complexu palaciegu sobre una antigua villa romana.
D'aquel complexu residencial namás perduraron el templu de San Miguel de Lliño y l'aula rexa conocía como Santa María del Naranco.
Ramiro I, nel so curtiu reináu ( 842-850) intentó realzar el so poder políticu y relixosu y escoyó la fastera del Naranco pa ello. El templu de San Miguel de Lliño sufrió un fundimientu por cuenta d' un desplazamientu de tierres que se produxo nel sieglu XI, polo que l'aspeutu del edificiu nun se correspuende col orixinal de planta basilical de trés naves y cabecera tripartita, amás de cuerpu d'entrada y tribuna rexa.
La ilesia destaca pola decoración escultórica,dende l'esterior apréciense delles celosíes calaes de fina llabra, col tímpanu decoráu con círculos entrelazaos.
Esti llabor escultóricu repítese nel interior, onde destaquen los capiteles, columnes y bases cola representación tallada de los símbolos de los Evanxelistes, daqué únicu nel conxuntu del Arte altomedieval européu.
Sobresalen na obra escultórica de San Miguel de Lliño les xambes qu'enmarquen el vestíbulu d'entrada, copia d'un dípticu consular romanu-bizantín pero con tratamientu iconográficu afechu a la Corte real.
Igualmente ye destacable qu'apaeza per primer vegada nel Arte Asturianu la decoración pictórica, cola representación de la figura humana nos sos frescos,caltiénense una figura entronizada y l'imaxe d'un músicu.
A unos 300 m de la ilesia de Lliño, atópase l'edificiu civil de Santa María de Naranco, obra tamién de Ramiro I y que probablemente sía la construcción más emblemática del Arte Asturianu.
L'edificiu axunta una serie d'innovaciones constructives que yá fueron inclusive resaltaes poles Cróniques de la dómina: Bóvedes de cañón, arqueríes murales ciegues, contrafuertes.
L'edificiu estructúrase en dos plantes abovedaes: Cripta y Sala Superior flanqueada por dos miradores. Nél intégrase per primer vegada la decoración escultórica na tectónica del edificiu. De manera que se muestren arrogantes columnes con sogueáu y capiteles corintios de gran perfección técnica n' arqueríes y fachaes de los miradores. Apaecen tamién capiteles troncopiramidales con figures de personaxes y animales na sala cimera, al pie de la representación de la Cruz Griega con Alpha y Omega nos llenzos tresversales. La decoración sigue con un gran repertoriu animalísticu nos 32 clípeos qu'axunten representaciones de cuadrúpedos, aves, grifos, hipogrifos, llabraos nel discu central y arrodiao d'una cenefa na que predominen tarmos vexetales, racimos de frutos y aves. Combinaos colos clípeos atópense sendes plaques con una representación de cuatro arcos en que'l so interior apaecen dos figures fronteres y dos caballeros encaraos.
Nel mirador oriental caltiense un altar con funciones eucarístiques: podiu y mesa con una inscripción na que se reflexa'l momentu de construcción del edificiu por mandatu rexu de Ramiro I y la so segunda esposa Paterna , cola fecha de consagración: 23 de Xunu de 848.
Cerque de los edificios alcuéntrase 'l Centru de Recepción ya Interpretación del Prerrománicu Asturianu del Naranco, llégase a él per un camín dende l'aparcamientu al que se llega dende Uviéu pela carretera del Naranco dirección Ules y al traviés de la llínea d'autobuses urbanos nº 3. La visita a esti Centru resulta de gran utilidá yá que dexa facer un percorríu al traviés de les distintes etapes del arte prerrománicu, venceyaes a la mesma evolución política del reinu ástur, ente los sieglos VIII y X. Esti percorríu fáese cola ayuda de mapes, cronogrames, fotografíes, plantes y planos de los monumentos más representativos. Amás, al traviés del Centru de Recepción pueden facese otres actividaes qu'inclúin una visita guiada al Centru y a los monumentos de Santa María del Naranco y San Miguel de Lliño.