Pregón Fiestes Patronales de Sotrondio
Dempués de dos años de pandemia la Plaza Ramón y Cajal de Sotrondio acoyó de nuevu la celebración de les Fiestes Patronales de branu n'honor de San Martín de Tours 2022.
Una fiestes qu'empezaron el xueves 7 de xunetu y estiéndense hasta'l llunes 11 de xunetu con una programación variada y pa tolos públicos, que ta convirtiéndose nuna de les meyores fiestes del Valle del Nalón y d'Asturies gracies al esfuerzu y bon facer de la Sociedá de Festexos.
En toa fiesta'l Pregón ye unu de los actos más importantes y ésti tuvo llugar el vienres 8 de xunetu.
Ye'l momentu nel que la Sociedá de Festexos fai pública reconocencia a un vecín o vecina y nel qu'esa persona respuende a esa reconocencia con unes emotives palabres.
Nesta ocasión la Sociedá de Festexos San Martín de Tours designó como Pregonera de Les Fiestes de Sotrondio 2022 a Alba Fernández Suárez, miembru d'una familia bien querida en Sotrondio a la que numberosos vecinos y vecines recuerden con ciñu.
Alba ye una prestixosa doctora, especialista en Medicina Estética. Cuenta con más de 10 años d'esperiencia nel oficiu y una estensa formación en distintos campos de la especialidá.
En concretu, ye esperta en técniques de fotorexuvenecimientu, estética corporal y manches na piel.
A lo llargo de la so trayectoria combinó'l so llabor asistencial con una importante xera divulgativa, siendo autora de diversos artículos científicos de la especialidá y ponencies, lo que-y fixo merecedora de distintos premios.
Na actualidá exerce como especialista en Medicina Estética en diversos centros, tales como la Clínica Santa Susana, l'Hospital Begoña, la Clínica Belladona y la Clínica Xovellanos, ente otres.
Tres la intervención d'Alba remató l'actu coles dos agrupaciones musicales del conceyu, la Banda de Música de Samartín del Rei Aurelio y la Coral San Martín de Sotrondio, que peslló la so actuación col Himnu de Sotrondio.