Playa Gavieiru o del Silenciu
La playa de Gavieiru , tamién conocía como playa del Silenciu , ye un pedreru o xogarral d'unos 510 metros de llargor y unos 30 metros d'anchu en función de les marees.
Tien forma de concha y ta arrodiada d'ensame de castros y cantiles cuarcíticos. Llégase a ella en pasando pol pueblu de Castañeres, onde para dir en coche habilitaron una caleya pa baxar y otra pa xubir. De siguío hai que baxar durante unos quince minutos per un camín de tierra hasta llegar a les escaleres de piedra habilitaes a la fin del trayectu, atopando dellos miradores nos qu'esfrutar del paisaxe.
La Sablera de Gavieiru atópase dientro d'una Zona d'especial protección pa les aves o ZEPA y tamién dientro d'un espaciu incluyíu nes llistes de Llugares d'importancia comuñal LIC, forma parte del Paisaxe Protexíu de la Mariña Occidental d'Asturies qu'incluye una franxa costera d'unos 35 kilómetros de llargor, allugada nos conceyos de Valdés y Cuideiru.
Esta playa cunta con un gran valor paisaxísticu y xeomorfolóxicu, que la convirtien nun espaciu d'interés didácticu. Pueden vese nella les formaciones llamaes Boudinage o amorcillamientu , estructura xeolóxica d'orixen tectónicu de resultes de l'alternanza de materiales xunto al desarrollu de fuertes plegamientos.
Amás de los procesos implicaos nel retrocesu de los sos cantiles, nel modeláu de la so plataforma de abrasión y nes formes d'acumuladura presentes na sablera onde destaquen les terraces marines y los cuspilitos , estes son son xeoformes efímeres que suelen permanecer solo mientres un ciclu de marees. Fórmense en condiciones especiales de vientu y marea, cuando en virtú d'estos, les corrientes de deriva mariniega son nules y que podemos ver en dalguna de les fotografíes.
Trátase d'una playa onde aprucen arenisques y pizarres de la Serie de los Cabos (Cámbricu mediu-Ordovícicu Inferior) coles capes en posición subvertical. Nella pueden vese numberosos budines romboidales y llenticulares, y estructures acomuñaes (cristalización de cuarzu na zona de separación de los budines y pequenes plegues -"scar folds"- acomuñaos a los pescuezos de los mesmos).
L'ausencia de sable doráu no fondero , con un pavimentu predrosu que supon l'antoxana del ancón de cantares rodaos qu'enllenen la sablera, fai que les sos agües sían de color verde esmeralda y conviértese nun llugar prestosu pa'l bucéu, anque esti requexu, sobremanera, ye un llugar d'Asturies para dexase llevar pol soníu de l'agua colándose entre les piedres mientres se contempla un paisaxe de castros, cantiles y formaciones xeolóxiques de fai millones d'años.