Macizu occidental de los Picos d'Europa

Unu de los llugares más apreciaos polos montañeros ye'l Macizu Occidental de los Picos d'Europa o Cornión, del qu'equí vos traemos les estupendes vistes dende El Torcu (2452m), una cume a la que puede llegase dende Pandecarmen al traviés d'una ruta llarga, pero de bon siguimientu hasta la Collada del Jou Santu, ellí abandónase'l senderu que se dirixe escontra la Caín pola Canal de Mesones pa siguir los jitos que lleven a la base de la canal d'accesu a esta cume.

Dende El Torcu vense les Torres de Cebolleda ( 2431 m) un conxuntu de cumes que son un allongamientu de la llínea de cumes de los Argaos, xunto a Peña Santa d' Enol (2486m) la segunda cume n'altor del Macizu Occidental de los Picos d'Europa .

D'últimes vemos la Torre Santa o Peña Santa de Castiella, que colos sos 2596 metros, ye'l picu más altu del Macizu Occidental de los Picos d'Europa .

La primer ascensión conocida a esta cume foi realizada por Paul Labrouche, François Bernat Salles y Vicente Marcos el 4 d'agostu de 1892.

Recuerda que pa facer travesíes de montaña hai que conocer perbién el terrén, dir acompañáu de guíes profesionales y llevar ropa, calzáu y material adecuáu.