La ruta del Alba
La ruta del Alba ye un senderu de Pequeñu recorríu nel conceyu de Sobrescobiu en plenu Parque Natural de Redes.
La ruta empieza en Sotu d'Agües, un típicu pueblu de la montaña central asturiana y sigue 'l recorríu de la vieya pista minera del camín de Llaímo d'unos siete kilómetros, que va paralela al calce del ríu Alba .
Traviesa les Foces de Llaímo nel monte del mesmu nome y termina na Cruz de los Ríos onde, metanes la vega, hai un abellugu de caza que data de 1965.
La ruta tien dos tramos estremaos, el primeru d'ellos asfaltáu ye especialmente fácil y aptu para dir con neños pequeños con bicicletes y, inclusive puede vese pareyes con carricoches de bebé, llega hasta la Ponte La Vega onde atopamos un área recreativa.
El segundu, daqué más complicáu conviértese en pista de monte onde en dellos tramos hai que tener curiáu para nun esnidiar, ye´l tramu de les Foces de Llaímo,a partir d'equí estréchase el pasu y asocédense los rabiones y cascaes nel calce del ríu faciéndolu especialmente curiosu pa terminar en La Cruz de los Ríos.
Esta ruta ta catalogada como Monumentu Natural y ta incluyida na Zona d'Especial Protección pa les Aves de Redes y na Reserva de la Biosfera de Redes pola so fauna qu'inclúi: como flora representativa: fayes, alisos, tilales, texos y escuernacabres, según mofos y liquen y como fauna: llondres, águiles reales, mierlos acuáticos y truches.
Cualquier rincón de la ruta escuende un estupendu motivu fotográficu nel qu'apreciar fauna, flora y formaciones rocoses y xeolóxiques d'esta parte del Parque Natural de Redes.
Dexámosvos al llau delles fotografíes pa que vos animéis a entamar esta popular ruta de la montaña asturiana.
