XXXVIII Xornaes Internacionales d’Estudiu
Esti martes 5 de payares a les 12:00 hores y hasta'l 7 desendolcaránse, nel Salón d'Actos de la Facultá de Filosofía y Lletres de la Universidá d'Uviéu, les XXXVIII Xornaes Internacionales d'Estudiu .
La inauguración va cuntar cola intervención del vicerrector d'Investigación de la Universidá d'Uviéu, José Ramón Obeso Suárez; el Vicedecano d'Ordenación Académica de la Facultá de Filosofía y Lletres, Juan José García González, y el presidente de l'Academia de la Llingua Asturiana, Xosé Antón González Riaño.
La sesión va empezar coles presentaciones de la edición dixital del númberu 121 de la revista 'Lletres Asturianes' y del númberu 9 de la revista 'Ciencies. Cartafueyos Asturianos de Ciencia y Tecnoloxía'.
La conferencia inaugural darala Ramón Lluís Bande y va falar sobre 'Como una familia ensin álbum fotográficu. Una mirada a un cine nacional asturianu posible'.
Pela tarde, les Xornaes van abrise cola ponencia 'El mitu de les llingües medievales primitives y la contraargumentación n'asturianolleonés', del profesor de la Universidá de Zürich, Philipp Obrist. Dempués van ufiertar les sos comunicaciones Inaciu Galán y González, Aránzazu Valdés González, Carlos Suari Rodriguez y Ataúlfo Gamonal Coto.
L'actu pesllarase cola ponencia de la profesora de la Universidá d'Uviéu, Olga Álvarez Huerta 'La primer traducción del llatín al asturianu: El Fueru de Llión'.
La primer conferencia del miércoles entamará a les 16 hores con Imanol Suárez Palma, de la University of Florida, que va encargase de: 'La posesión inalienable en las construcciones medias del castellano y el asturiano', al que siguirán dos comunicaciones d'Alberto Góméz y Lourdes Castro Moutinho xunto con Rosa Lidia: 'Estudio de caso de la prosodia en el noroeste de Portugal: aportaciones a un atlas multimedia de las lenguas románicas', y la segunda al respeuto de 'Un estudio de la variación prosódica en mirandés'.
Esti mesmu miércoles la xornada complétase con dos ponencies , una de Josefa Dorta, de la Universidad de La Laguna 'Un estudio dialectométrico de las declarativas e interrogativas absolutas' y otra d'Antonio Romano, de la Università degli Studi di Torino: 'Un modèle d'organisation phylogénétique des données prosodiques asturiennes'.
El xueves pésllense les Xornaes Internacionales d'Estudiu coles conferencies que vuelven entamar a les 16.30 hores, con Lucia Molinu, de la Université Toulouse II-Jean Jaurès: 'Préstamos en asturiano: estudio morfo-fonológico', y José Enrique Gargallo, de la Universitat de Barcelona con 'Refranes meteorológicos del asturleonés en su contexto romance, según los datos de ParemioRom'. Pésllense les xornaes coles comunicaciones de Gonzalo Llamedo, Xuan Lajo y Claudia Elena Menéndez Fernández.