XX Premiu «Emilio Alarcos» de Poesía
La Conseyería de Cultura, Política Llingüística y Turismu publicó la convocatoria del Premiu «Emilio Alarcos» de Poesía 2021. El gallardón llega a la so venti edición consolidáu como un referente ente los premios de poesía nacionales por atesorar una nómina de ganadores de prestixu reconocíu y pola calidá de los sos xuraos.
Nos sos empiezos el certame tuvo presidíu por Ángel González, el poeta asturianu más importante del sieglu pasáu y unu de los más relevantes de la denominada xeneración de los 50, y dende'l 2008 asumió la presidencia'l poeta Luis García Montero, actual director del Institutu Cervantes.
A lo llargo d'estos 20 años formaron parte del xuráu del premiu Alarcos nomes de gran relevancia nos ámbitos de la poesía, la edición, la crítica lliteraria o l'universitariu, como Francisco Brines, Carlos Marzal, Aurora Luque, Caballero Bonald, Chus Visor, José Luis García Martín, Luis Alberto de Cuenca o Josefina Martínez, directora de la cátedra Emilio Alarcos Llorach, que tuvo nel xuráu dende la primer edición.
La nómina de premiaos y premiaes nel certame ta integrada por nomes reconocibles nel actual panorama de la poesía española nueva. El primer ganador del Alarcos de poesía foi l'asturianu Martín López-Vega y el postreru, el granadín Antonio Praena. Ente dambos figuren nomes como Javier Almuzara, Eduardo Jordá, Emilio Martín Vargas, Irene Sánchez Carrón, Ioana Gruia, Federico Gallego Ripoll, Enrique Gracia Trinidad o Julio Rodríguez.
El Premiu «Emilio Alarcos» de Poesía ta dotáu con 6.000 euros y el plazu pa la presentación d'orixinales remata'l 2 d'agostu próximu.