XX Concursu de Canción Asturiana de Samartín del Rei Aurelio
El XXII Concursu de Canción Asturiana de Samartín del Rei Aurelio empieza'l vienres 10 de xineru nel Aula Cultural La Plaza de Sotrondio. Eso va ser durante les primeres seis selmanes del certame, les semifinales, les finales y la gala de clausura van ser nel teatru municipal de L'Entregu. El certame ta empobináu pola Asociación de la Canción y el Folclore del Valle del Nalón y cuenta col patrociniu del Conceyu de Samartín del Rei Aurelio.
Na primer xornada de celebración, qu'entama a les siete la tarde, van intervenir José Manuel González, Álvaro Fidalgo, Enrique Castañón, Manuel Collado, Manuel Sañudo y Patricia Pariente, na categoría absoluta; Manuel López, Salvador Ondo, José Luis Sánchez, Isidorina Naredo y Talia Noriega, na categoría d'aficionaos; Mara Suárez, en menores de 18 años; y Alejandro Begega n'infantil, acompañaos pol gaiteru Ramón García. La presentación del certame va correr al cargu de Luis Alberto M. Ardines y l'entrada va costar trés euros.
El concursu inclúi tamién como novedá la incorporación d'un premiu únicu en categoría mista pa la meyor interpretación qu'emule a dos de les lleendes de la tonada asturiana, como son Obdulia Álvarez, "La Busdonga"; y Ángel González, "El Maragatu", acompañaes con música de pianu.
Un centenar de cantantes procedentes de tola xeografía asturiana y de Cantabria inscribiéronse nesti certame, onde'l xuráu va valorar la calidá de la voz, les vocalizaciones, afinación y matización na interpretación de los temes, xunto a la puesta n'escena, la execución y la dificultá de la composición musical y la variedá d'estilos.
El concursu inclúi per cuartu añu consecutivu'l premiu "Cantar Mineru", patrocináu pol sindicatu SOMA-FITAG-UXT. Esti galardón va tener trés primeros premios pa los meyores temes asociaos a la tradición de la minería del carbón n'Asturies.
La final del XXII Concursu de Canción Asturiana de Samartín del Rei Aurelio va tener llugar el vienres, 24 d'abril, afitándose pal 8 de mayu, la gala d'entrega de los premios.