Xornaes culturales " Los Xueves de castilletes y carbón".

Les Xornaes Culturales "De castilletes y carbón" de Llangréu empiecen la so octava edición esti xueves 2 de payares cola primera de les conferencies del ciclu "Los xueves de castilletes y carbón" con un analís de Xosé Ramón Martín Ardines sobre la "oficialidá" del asturianu.Esta iniciativa cultural ta entamada pola Fundación Nuberu, cola collaboración del consistoriu llangreanu. Nesta ocasión,pesllarán les xornaes l'actuación en La Nueva del grupu formáu por Chus Pedro y Manolo Peñallos. Va ser el colofón musical a un mes dedicáu a la cultura asturiana. La cita ye'l sábadu 2 d'avientu.
La presentación del eventu tuvo llugar el pasáu martes nel Centru de Referencia de la Cultura y la Llingua asturiana "Casa de los Alberti", en Ciañu, que tamién va allugar toles conferencies de les xornaes.
El cantante de Nuberu estimó la predisposición de les instituciones llangreanes que fixeron posible que la fundación col nome del grupu tuviera la so see nel conceyu de la cuenca del Nalón. Chus Pedro esplicó que "Nuberu" foi posible gracies a les influencies sociales y culturales d'aquel ambiente de los años 70" onde pasó la so mocedá. Mentó al que fuera'l so profesor, Pablo Manzano, y qu'agora exerce de presidente de la Fundación Nuberu. Según añedió Chus Pedro, la so carrera sofitóse en trés bases. "El so compromisu col mundu del trabayu y solidariu, la tradición innovadora y el compromisu cola llingua, la cultura y les señes d'identidá d'un país llamáu Asturies".Pablo Manzano encargose de detallar la programación de les xornaes, que van tomar tol mes de payares. Nel cine Felgueroso de Sama, el ciclu "Baxando pa la galería" va ufiertar cuatro llargumetraxes cola minería como exe temáticu. Dientro de "La Casa de los Alberti" va esfrutase tol mes de la esposición fotográfica "Mina nel Mundu". El ciclu  conferencies inclúi'l recital lliterariu "Compañeru dame tira", dirixíu por Chechu García.