Xornada sobre ‘l curtiumetraxe de Laboral Cinemateca
Laboral Cinemateca entama una xornada sobre'l curtiumetraxe dirixida a los profesionales asturianos.
Ismael Martín, responsable de distribución de la ECAM, y Sébastien Duclocher, del Festival de Curtiumetraxes Clermont-Ferrand, van tratar sobre'l desenvolvimientu y financiación de los proyectos y sobre les claves del ésitu d'una obra cinematográfica.
La xornada complementase con trés sesiones de curtiumetraxes de distintes temátiques y estilos, premiaos nos más prestixosos festivales, abiertes al públicu xeneral. Tres casi dos años de funcionamientu, el programa Laboral Cinemateca Curtios consolídase na distribución d'un catálogu permanente de nueve trabayos de realizadores asturianos.
Laboral Cinemateca entama'l próximu sábadu 26 de mayu una Xornada profesional alrodiu del curtiumetraxe qu'integra actividaes pa mozos interesaos en poner en marcha y espublizar los sos trabayos, amás de proyecciones abiertes a tou tipu de públicu, según indicó'l Viceconseyeru de Cultura y Deporte, Vicente Domínguez, quien fixo, amás, un balance de los casi dos años de funcionamientu del programa Curtiumetraxes Laboral Cinemateca.
Mientres la presentación de la Xornada, pa la que nun ye necesaria inscripción previa, van ufiertase distintos recursos y estratexes que puedan ayudar a potenciar la creación audiovisual en formatu curtiu. Dos especialistes de reconocíu prestíu, Ismael Martín y Sébastien Duclocher, van compartir colos asistentes la so esperiencia y visión sobre aspeutos concretos de la industria del curtiumetraxe y el procesu creativu col enfotu de meyorar la calidá de los proyectos, visibilidá, espardimientu y percorríu a nivel nacional ya internacional.
Ismael Martín -responsable de Distribución de la Escuela de Cinematografía y del Audiovisual de Madrid (ECAM) y dende 2005 del programa Madrid en Curtiu y autor d'un blogue de referencia especializáu na industria del curtiu, va ufiertar una panorámica de les distintes posibilidaes qu'esisten a la hora de llograr la financiación necesaria pa la producción d'un curtiu, amás d'incidir sobre la importancia de crear un dossier afayadizu y realista y de la creación d'una estratexa de distribución específica pa cada proyectu.
Pela so parte Sébastien Duclocher -coordinador del Departamentu d'Educación del Festival de Clermont-Ferrand- falará sobre delles de les decisiones, tantu temátiques como estilístiques que puede faer que'l nuesu trabayu fracase o tenga ésitu.
Estes conferencies compleméntense con trés sesiones de proyecciones estremaes: la primera, una selección de curtios españoles de gran percorríu en festivales nacionales ya internacionales; una segunda sesión temática alrodiu de los Curtiumetraxes y videoxuegos; y la tercera centrada nes nueves narratives y con títulos apocayá premiaos en Clermont Ferrand "10 años de LABO", comisariada y presentada por Duclocher. La xornada profesional ye de llibre accesu (hasta completar aforu), siendo imprescindible la retirada d'invitación pa les sesiones de proyecciones.