WEST SIDE STORY EN XIXÓN

West Side Story, el musical estadounidense basáu na obra de Shakesperare Romeo y Julieta llega a España directamente dende Broadway pa cuntanos una hestoria d'amor nel Nueva York de los años 50. Anque tol mundu recuerda la película de 1961 que ganó 10 premios Oscar, lo cierto ye que'l montaxe tien los sos oríxenes nun espectáculu empobináu y coreografiáu por Jerome Robbins con lletres de Stephen Sondheim. La trama cunta l'enfrentamientu ente dos bandes caleyeres de distintes etnies engarraes pol romance entre Tony y María. Amor, violencia, prexuicios y problemes adolescentes afiguraos en cantares tan llexendarios como 'Something's coming', 'Jet Song', 'I feel pretty' o 'A boy like that'.

Del 28 de payares al 1 d'avientu podrá vese nel Teatru de la Llaboral unu de los musicales más importantes y representativos del teatru universal. La partitura al cargu de Leonard Bernstein y Stephen Sondheim ye unánimemente reconocía como una de los meyores na hestoria de los musicales. Agora, producíu por SOM Produz y coincidiendo col Centenariu de Leonard Bernstein, estrénase por primer vegada n'España la versión orixinal íntegra cola qu'esti musical míticu debutó nel Winter Garden Theatre (Broadway, 1957).
SOM Produz ye la productora de Billy Elliot, Priscilla o Cabaré, ente otros grandes musicales internacionales.