Visita con Al Llau del Llar l'antiguu Exiptu
Les autoridaes exipcies, cola collaboración de les misiones arqueolóxiques estranxeres qu'escaven ellí, escurrieron un mediu pa entretener a los millones d'amantes de la cultura faraónica durante esta temporada de confinamientu sanitariu: realizar visites virtuales polos distintos monumentos del país.
La primera d'estes cápsules" de cultura exipcia que se llanzó ye un itinerariu pola tumba de Menna (TT69), en Luxor, 600 kilómetros al sur d'El Cairo. Menna foi un altu funcionariu exipciu que, ente otros, ostentó'l títulu de Supervisor de los campos de Amón mientres la dinastía XVIII (1539-1292 a.C.), de xuru so los reinaos de Tutmosis IV y Amenhotep III.
La segunda propuesta ye la tumba de la reina Meresankh III, esposa de Kefrén y nieta del faraón Keops (2509-2483 a.C.), el constructor de la Gran Pirámide de Giza. La tumba, una mastaba doble, descubrióse'l 23 d'abril de 1927 pol exiptólogu norteamericanu George Reisner, y paez ser que nun principiu taba destinada a Hetepheres, la madre de Keops. Una de les sales más sorprendente de la mastaba ye la llamada sala C, que ta decorada con una filera de diez estatues tallaes na roca, que representen a Meresankh y a dellos de los sos familiares.