V Certame de Teatru Escolar en llingua asturiana

Los colexos de Samartín del Rei Aurelio ganen los premios del V Certame de Teatru escolar en llingua Asturiana.

El Colexu Públicu Rei Aurelio  de Sotrondio y el Colexu Públicu El Bosquín, de L'Entregu fueron galardonaos col primer y segundu premiu respectivamente a la meyor obra de teatru representada n'Educación Primaria del V Certame de Teatru Escolar en llingua asturiana. Esta iniciativa enmárcase na Selmana de les Lletres Asturianes, entamada pola Dirección Xeneral de Planificación Llingüística y Normalización.

"Una hora curtia" ye'l títulu de la obra llevada a escena pol Colexu Rei Aurelio, y "Un centru salú" la representada pol colexu El Bosquín. Les dos fueron consideraes pol xuráu dientro del apartáu d'Educación Primaria d'esti certame nel que tamién resultaron premiaos otros colexos nes categoríes de meyor dirección, interpretación o vestuariu, ente otres. Amás, l'alumnu Pablo Menéndez, del colexu Rei Aurelio, foi premiáu col galardón al Meyor Monólogu d'Educación Primaria, col testu "Soi de Xixón".

En Secundaria y Bachilleratu el primer premiu foi pa la obra "Na corte del rei Silo", del IES de Pravia y el segundu premiu pa " Cinco hores con Mario", del IES César Rodríguez de Grau.

La entrega premios va tener llugar el próximu xueves, a les 18,00 hores, nel Teatru de La Llaboral, en Xixón, nun actu nel que van representase les obres ganadores: "Una hora curtia" y el monólogu "Soi de Xixón" .La entrada ye de baldre.