V Alcuentru col Deporte en Samartín del Rei Aurelio
El Patronatu Municipal de Deportes de Samartín del Rei aurelio celebrar esti xueves 20 de febreru, a les 19 hores, nel Teatru Municipal, la quinta edición del "Alcuentru col deporte de Samartín del Rei Aurelio", una gala na que se va premiar a 60 deportistes del conceyu que llograron pódium en 2019 y a dellos equipos de fútbol y baloncestu.
Van recibir premios a títulu individual deportistes de distintes disciplines: atletismu, karate, yudu, tenis, automovilismu, bádminton, natación, ciclismu, tai jitsu, brazilian jiu jitsu, tiru con arcu, moto trial, ximnasia rítmica, alterofilia y ximnasia trampolín.
Coles mesmes, van ser galardonaos el club deportivu de fútbol d'El Bosquín, en categoría benxamín, y l'Escuela de Fútbol d'El Parque, nes categoríes alevina, infantil, cadete, pol so ascensu de categoría, amás de los equipos de fútbol y baloncestu del Club Dedis Rey Aurelio de Persones con Discapacidá, que resultaron clasificaos ente los trés primeros puestos.
La gala, que va ser conducida pola periodista Carmen Liedo, va incluyir amás de la entrega de los galardones, la concesión de dos menciones especiales a los 40 años de la Vuelta Ciclista a los Valles mineros y al atleta solidariu Héctor Moro Díez.
La Vuelta Ciclista a los Valle Mineros, impulsada nos sos oríxenes por Florentino Fernández "Florín" y entamada nos últimos años por Vicente Merino, director de Cyclea, ye una prueba llonxeva perbién asitiada a nivel nacional ya internacional na que cada añu participen equipos de más d'una ventena de provincies españoles y tamién d'otres rexones de Francia o Portugal.
La Vuelta Ciclista a los Valles mineros ye amás una competición que potencia'l deporte base y apuesta pola igualdá de xéneru fomentando la participación femenina en visu a superar la tradicional fienda qu'entá dixebra la representación ente los homes y muyeres nel mundu del ciclismu.
Per otra parte, en reconocencia a los valores humanu y solidariu nel Deporte, Samartín del Rei Aurelio va galardonar tamién al atleta Héctor Moro Díez, qu'en 2019 compitió en 15 maratones solidarios, con una marca inferior a les trés hores por prueba, pa recaldar fondos destinaos a la llucha contra la leucemia destinaos a la Fundación Josep Carreras.
Esta xesta deportiva, que lu llevó a percorrer media España, xúnese a otros tantos retos deportivos consiguíos nos postreros ocho años que-y valieron distintes distinciones y la recaldación de 200.000 euros que fueron donaos a distintes causes sociales y a la investigación del cáncer y otres enfermedaes.
Apasionáu del atletismu, la perda del so padre enfermu de cáncer camúdo-y la so percepción del deporte que pasó a convertise nuna causa social, qu'al traviés de metes imposibles y kilómetros solidarios llevólu a recaldar fondos ensin descansu al serviciu de la medicina.
La celebración d'esti alcuentru va cuntar cola collaboración de l'academia "Sofi Dancie" que se va encargar de l'animación de la gala con dellos espectáculos de baille. Tamién se contempla una exhibición deportiva.