Un llibru al llau.Sorteamos un exemplar d'esti llibru ente tolos que mos digáis al traviés d'esti mediu ( Facebook o Twiter ) la que consideréis la pallabra más prestosa de la seronda.

Nesta seronda na qu'además del tiempu 'l coronavirus oblíganos a pasar más tiempu en casa, nada meyor que tener al llau un llibru. Por eso Al Llau del Llar entama'l sortéu d'un llibru n'asturianu ente toes y tolos que respondáis cada selmana a una entruga.

Nesta ocasión sorteamos el llibru Güelu Ismail d'Esther Prieto ente tolos que mos digáis al traviés d'esti mediu ( Facebook o Twiter ) la que consideréis la pallabra más prestosa de la seronda, el tardíu, l'otoñu.

El plazu termina'l próximu sábadu 21 de payares a les 00:00 hores, y el llibru mandarémoslu per correu postal a les señes qu'indique'l ganador del mesmu. Facebook y Twiter nun patrocinen ni avalen esti concursu.

Güelu Ismail, Premiu «Xosefa Xovellanos» de Novela del añu 2001, ye un percorríu pela historia del pueblu palestín a lo llargo de la primer mitá del sieglu XX. Dividida en trece capítulos y un epílogu, nella prodúcense númerosos saltos nel tiempu, dende'l pasáu reflexáu nos recuerdos del güelu Ismail hasta'l presente narrativu, representáu pol neñu Nader, el ñetu preferíu.

Esta novela, amás, ye la primera escrita n'asturianu por una muyer dende qu'Enriqueta González Rubín publicara nel 1875 Viaxe del tíu Pacho el Sordu a Uviedo.

Esther Prieto (Arenas de Cabrales, 1960) diose a conocer como poeta nel 1992 con Edá de la memoria y nel 1998 ganó'l Premiu «Teodoro Cuesta» de Poesía con La mala suerte (2000). Responsable de la edición lliteraria de la obra de Llorienzu Novo Mier (1991) y Cuno Corquera (1993), nel añu 2005 publicó Gramática d'asturianu. Guía de consulta rápida, resultáu del so llabor profesional de correctora editorial. Collaboradora nel periódicu Les Noticies, delles de les columnes ellí publicaes recoyóles nel volume Chicolate espeso (2015). En Tres de la quema (2016), n'edición billingüe asturianu-castellanu, reúne tola so poesía, la yá publicada nos poemarios mentaos más p'arriba y dellos poemes nunca nun editaos en llibru.