Güelu Ismail d'Esther Prieto.Consigue un exemplar participando nel concursu "Un llibru al llau".

Güelu Ismail, ye'l llibru col qu' Esther Prieto algamó'l  Premiu «Xosefa Xovellanos» de Novela del añu 2001.

La novela ye un percorríu pela historia del pueblu palestín a lo llargo de la primer mitá del sieglu XX. Dividida en trece capítulos y un epílogu, nella prodúcense númerosos saltos nel tiempu, dende'l pasáu reflexáu nos recuerdos del güelu Ismail hasta'l presente narrativu, representáu pol neñu Nader, el ñetu preferíu.

Esta novela, amás, ye la primera escrita n'asturianu por una muyer dende qu'Enriqueta González Rubín publicara nel 1875 Viaxe del tíu Pacho el Sordu a Uviedo.

Esther Prieto (Arenas de Cabrales, 1960) diose a conocer como poeta nel 1992 con Edá de la memoria y nel 1998 ganó'l Premiu «Teodoro Cuesta» de Poesía con La mala suerte (2000). Responsable de la edición lliteraria de la obra de Llorienzu Novo Mier (1991) y Cuno Corquera (1993), nel añu 2005 publicó Gramática d'asturianu. Guía de consulta rápida, resultáu del so llabor profesional de correctora editorial. Collaboradora nel periódicu Les Noticies, delles de les columnes ellí publicaes recoyóles nel volume Chicolate espeso (2015). En Tres de la quema (2016), n'edición billingüe asturianu-castellanu, reúne tola so poesía, la yá publicada nos poemarios mentaos más p'arriba y dellos poemes nunca nun editaos en llibru.

Al Llau del Llar en collaboración cola Academia de la Llingua asturiana y l'Ayuntamientu de Samartín del Rei Aurelio , entamen una campaña de promoción de la Lliteratura Asturiana , nesta ocasión facémoslo col llibru Güelu Ismail , del que sorteamos un exemplar ente toes y tolos que nos unviéis un corréu solicitando participar nel sorteu a : alllaudelllar@hotmail.com.

Tienes de plazu hasta les 00:00 hores del sábadu 21 de payares.