Túmulu de la Campa L'Españal
Terminen estos díes los trabayos de la campaña d'escavaciones na campa L'Españal, en Samartín del Rei Aurelio, na que s'atoparon dos cámares funeraries -una de 6.000 y otra de 5.000 años d'antigüedá.
La responsable de la escavación, l'arqueóloga Covadonga Ibáñez, comentó que'l complexu funerariu yera muncho más ampliu de lo previsto. Ya que nun principiu escaváronse unos 75 metros cuadraos a resultes d'unos trabayos de reforestación que dieron por casualidá col complexu funerariu fai dos años. y salió a la lluz la primer cámara funeraria. En trabayos posteriores afayóse la segunda, y datáronse por aciu la prueba del carbonu 14: Una del 4.000 antes de Cristu, y l'otra, del 3.000 A. C. Naquella excavación alcontráronse oxetos, ufriendes funeraries, ente los que destacaba un cuchiellu de xil.
Esti añu la excavación ampliose a los 166 metros cuadraos y atopáronse oxetos "de la vida cotidiana", daqué que nun ye tan avezao topar nesti tipu de yacimientos.L'arqueóloga comenta que d'esta dómina conocemos meyor cómo morríen, los sos ritos y costumes funeraries, que 'l so día ente día.
Reparando na escavación nel momentu actual ye más cenciello imaxinase cómo yera la zona fai cinco mil años. Un perímetru circular de piedres facía la función d'un zócalu. Sobre elles, y tapando 'l círculu, taba la tierra, y coronando 'l complexu, la tapa de les cámares funeraries. Esta sería la única parte de les tumbes que yera visible al güeyu. Les piedres que formaben dambes cámares atópense nel interior del túmulu. Col pasu de los milenios el túmulu derrumbose y sólo la casualidá de los trabayos de plantación d'arboles na zona fizo qu'apareciera y entamara la escavación.
Anguaño, na segunda campaña, topáronse otru tipu d'oxetos, nesta ocasión dos machacadores, piedres de cuarcita, sacaes del ríu que s'usaben pa esmagayar cereales o abiyotes. Y que según l'arqueólogaCovadonga Ibáñez son piedres que tienen les marques del so usu y que nesi llugar tán fora de contestu . Esti tipu d'oxetos non solo dexen conocer meyor los ritos y usos funerarios sinón que nos averen a la manera de vida de los pobladores que construyíen los túmulos.