¡Hay motín,compañeras! nel Teatru de L'Entregu

El vienres 5 d'ochobre a les ocho la tarde'l Teatru Municipal de Samartín del Rei Aurelio en L'Entregu,acueye la representación de la obra d' Alberto Miralles "Hay motín, compañeras!,pol Colectivu Teatral Les Filanderes baxo la dirección de la entreguina Carmen Gloria García.
L'alarmante estáu del sistema penitenciariu, la crítica al periodismu televisivu sensacionalista y la publicidá abusivo, el pulsu ente machismu y feminismu son los asuntos sobro los que xira la obra d'Alberto Miralles, ún de los más prestixosos autores dramáticos españoles d'estos tiempos.
Nuna acción protagonizada por muyeres con un característicu sentíu del humor onde l'autor critica'l mundu de la publicidá, la violencia doméstica y la discriminación femenina.
Na trama una publicitaria utiliza un motín na cárcel de muyeres pa promocionar un nuevu productu llácteu, ensin saber que, de la mesma, les autoridaes de la prisión usen el motín como escusa pa despintar la muerte de dos preses.
El colectivu Teatral Les Filanderes preséntanos una obra llena de crítica, reflexón y humor  dientro  la 5ª Muestra de Teatru Cómicu de Samartín del Rei Aurelio.