Samartín del Rei Aurelio despide a una personalidá de la canción asturiana: Gerardo Orviz
A última hora d'esti domingu 9 de mayu llegaba a Samartín del Rei aurelio la noticia de la pérdida d'unu de los más grandes y veteranos intérpretes de la canción asturiana, Gerardo Orviz Iglesias.
Gerardo escribió munchos de los cantares qu'interpretó a lo llargo de la so trayeutoria artística , una intensa biografía que recoyó'l so discípulu Jesús Alonso nel llibru "Toda una vida... con la canción asturiana". Un llibru que se presentó dientro d'un actu organizáu pola Asociación Bicentenariu de Samartín del Rei Aurelio nel mes de payares de 2015.
Gerardo Orviz quedó a los 17 años en segunda posición nun concursu en Barredos. En 1958 y 1959 ganaría'l certame "Camín de la gloria" de Radio Oviedo. En 1962 marcha pa Barcelona onde s'integró nel Centru Asturianu y nel so coru. Ellí permaneció, al pie de la so esposa, mientres 25 años.
Trescurríu esi tiempu retornó a Asturies, a Riegalatabla en Blimea, y pasó a
formar parte del Cuartetu Nalón y dempués al Trío La Toná, amás de
tar venceyáu a la Coral San Martín de Sotrondio.
Gerardo además d'anovar la canción asturiana, punxo música a poemes d'Alfonso Camín o Elvira Castañón y grabó más de 300 cantares , ganando dellos concursos de prestíxu.
Gerardo Orviz collaboró con Radio San Martín nos primeros años de la emisora nos años noventa del pasásu sieglu y foi unu de los fundadores del Concursu de Canción asturiana de Samartín del Rei Aurelio xunto a los componentes de la emisora local.
La pérdida de Gerardo xúnese a la de Niti Nava nun murniu domingu 9 de mayu pa Blimea y Samartín del Rei Aurelio.