Somao, Premiu al Pueblu Exemplar d' Asturies

La parroquia rural de Somao en Pravia foi galardonada col Premiu al Pueblu Exemplar d'Asturies 2020, según fixo públicu güei 1 de setiembre n'Uviéu'l xuráu encargáu de la so concesión.
El xuráu d'esti Premiu convocáu per trixésimu primer añu consecutivu pola Fundación Princesa d'Asturies- tuvo presidíu por Francisco Rodríguez García, presidente de Reny Picot; ya integráu por Amada Álvarez Pico, presidenta de l'Asociación de Guisanderes; Xuacu Amieva Celorio, gaiteru; Lorenzo Arias Páramo, profesor titular d'Hestoria del Arte; María Cardín Blanco, directora comercial y de marketing del Grupu El Gaitero; Yolanda Cerra Bada, presidenta de l'Asociación Asturiana d'Antropoloxía y Patrimoniu Etnolóxicu; Begoña Fernández-Costales Muñiz, presidenta de la Federación d'Empresaries y Directives d'Asturies; Rosa Fernández Rubio, alpinista; Adolfo García Martínez, antropólogu; Francisco González Orejas, director en funciones de la RTPA; Juaco López Álvarez, director del Muséu del Pueblu d'Asturies; Marta Magadán Díaz, editora; Juan José Menéndez García, presidente del Conseyu Regulador de la Indicación Xeográfica Protexía Faba Asturiana; Ramón Rodríguez Álvarez, director del Real Institutu d'Estudios Asturianos (RIDEA); Jorge Suárez Díaz, presidente de l'Asociación Asturiana d'Empresa Familiar; Mario Suárez Porras, fotógrafu; José Tuñón Huerta, director de la Fundación Oso Asturies; Etelvino Vázquez Pérez, director y actor; y Fernando Delgado Álvarez, periodista y secretariu del xuráu.
Enclavada nel mediu xeográficu del baxu Nalón, nuna contorna de transición ente árees rurales y urbanes, la parroquia rural de Somao marca'l puntu más septentrional del conceyu de Pravia, ente que eclesiásticamente pertenez al de Muros de Nalón. La localidá ta asitiada nun altu con vistes al mar y a la desembocadura del ríu Nalón. Con unos trescientos habitantes na actualidá, Somao ye una de les trenta y nueve parroquies rurales qu'hai n'Asturies con personalidá xurídica propia y con capacidá pa xestionar y entamar los sos bienes, ente los que s'atopen unes cuatrocientes hectárees de monte y dellos pacionales, que son una importante fonte d'ingresos pal pueblu, xunto a otros procedentes del arriendu de delles cases y la xestión del chigre del centru social. La parroquia tuvo rexida ente 2015 y 2019 por una xestora ensin signu políticu, formada dempués de la dimisión del anterior alcalde pa caltener el so estatus xurídicu y evitar que los sos bienes pasaren a ser propiedá del Conceyu de Pravia. Tres les elecciones municipales de 2019, la xunta escoyida ta formada polos integrantes de l'anterior xestora.
El pasáu de Somao ta amestáu a la hestoria de la emigración y cuenta con un patrimoniu arquitectónicu d'orixe indianu de notable valor. Pero amás de los destacaos palacetes d'esta dómina -dalgunos d'ellos obra del arquiteutu Manuel del Bustu-, el pueblu tamién se benefició porque los indianos invirtieron na trayida d'agua, caminos y fontes y financiaron la construcción d'edificios públicos, como les escueles (1925), el cine escolar benéficu (1920) y l'ilesia (1903), amás del parque de la localidá. El legáu indianu convive coles construcciones típiques asturianes, como horros, paneres y payares, siendo la quintana o casería'l tipu de construcción que muestra un pasáu agrariu vinculáu a la esplotación del campu y la ganadería.