"Síndrome de Diego" el curtiu que l'actriz entreguina Nieves Fernández Montes presentará nel Festival de Sitges

Nieves Fernández Montes ye una xoven arquitecta de L'Entregu que vive en Barcelona y debuta como actriz nel curtiumetraxe "Síndrome de Diego" que va presentase al Festival de Sitges, pa consiguilo l'equipu del "Síndrome de Diego" punxo en marcha una campaña de captación de fondos (crowdfunding) n'internet (al traviés de la plataforma Verkami) pa facer posible la filmación de la película, un curtiumetraxe d'horror sobre "la familia perdía, el síndrome de Dióxenes, bruxos cuánticos y los dioses arcaicos".

Según l'equipu'l guión del "Síndrome de Diego" ye una hestoria de environmental horror, de corte tecno-ocultista, onde les sos muses moren a mediu camín ente obres d'horror de los 70 (Suspiria / Alíen), les obres de los 80 riques en mitoloxía propia (John Carpenter) y les cloaques de The Matrix.

Sinopsis:

Inés (Nieves Fernández Montes) ye una trabayadora social a la que-y mandaron participar nun operativu de desahuciu n'una vivienda por causes de salú pública.
Al revisar la documentación del operativu, descubre que la persona qu'atropa la basura na casa ye'l so hermanu mayor Diego, desaparecíu fai 20 años. Inés decide adelantase personalmente antes del operativu de desahuciu sanitariu p'avisalu de lo que-y vien enriba, ensin apenes marxe de tiempu disponible.
Los protocolos sanitarios municipales determinaron un posible casu de Síndrome de Dióxenes, pero lo qu'Inés va topar nesa casa, va más allá de lo humanamente estructurao.

Descubre la hestoria viendo'l trailer calcando na imaxen y sabrás cómo participar nel crowdfunding pa facer posible la filmación del curtiumetraxe.