Santullanu, viaxe al sieglu IX

Hasta'l 21 d' ochobre podrá visitase la esposición "Santullanu, viaxe al sieglu IX" , una innovadora muestra qu'ufierta una orixinal visita a los tiempos en que se construyó l'edificiu prerrománicu de Santullanu, catalogáu como Patrimoniu de la Humanidá pola UNESCO dende 1998.
La recreación dixital de la ilesia xune arte y tecnoloxía y desenvolvióse ateniéndose a los más rigorosos criterios hestóricos.
El puntu fuerte de la esposición ye la reconstrucción dixital del estáu orixinal de les pintures de Santullanu, el conxuntu mural de pintura altumedieval más emportante de tolos que se caltienen n'Europa. Gracies  a gafes de realidá virtual los visitantes van poder "entrar" nesti templu y contemplar les sos pintures como si tuvieren acabante terminar.
El viaxe nel tiempu complétase con toa una esperiencia sensorial: al traviés del oyíu puede escuchase la banda sonora de la vida cotidiana y de la música de l'Alta Edá Media, col olfatu pueden golese dellos aspeutos del Prerrománicu y col tactu, percibir testures similares a les d'aquelles pintures, texíos o orfebrería altomedieval.