Recuerdu a Arturo Fernández nel Muséu del Pueblu d'Asturies

Ente les esposiciones que pueden vese nel Muséu del Pueblu d'Asturies atópase Arturo Fernández en cartel. 25 años de carteles de cine español (1958-1983).

La esposición muestra ventidós cartelos orixinales de películes de cine español protagonizaes pol actor xixonés Arturo Fernández na segunda metá del sieglu XX. Tolos cartelos pertenecen a la colección del Muséu del Pueblu d'Asturies, que na actualidá caltien 130 cartelos de películes de cine rellacionaes con Asturies.

Na esposición puede vese la evolución del cartelu de cine nesos venticinco años. Dende los cartelos de los años cincuenta, que se realizaben puramente con técniques pictóriques, hasta la incorporación de la fotografía na década siguiente, que tuvo los sos detractores entre los mesmos cartelistes pero qu'acabaría per imponese nos ochenta. En tou esti tiempu foi habitual el montaxe que combinaba'l dibuxu cola imaxe fotográfica.
Na selección tán representaos los más importantes y prolíficos autores de cartelos de cine d'aquellos años, como Jano (Francisco Fernández-Zarza Pérez, Madrid, 1922-1992), Mac (Macario Gómez Quibus, Reus, 1926-Olesa de Montserrat, 2018) o Montalbán (José Montalbán Saiz, 1926).
La muestra complétase con publicidá d'estes películes realizada poles distribuidores cinematográfiques, entraes de sales de cine de Xixón de los años sesenta y setenta, y fotografíes del actor procedentes del archivu del diariu "La Voz d'Asturies", que tamién se caltien nel muséu.
Esta esposición instalóse como complementu a la tercer parte de la esposición permanente de "Los asturianos na cocina. La vida doméstica n'Asturies, 1800-1965", na que s'esiben oxetos de la vida cotidiana de los años 1950 a 1965.

La entrada ye de baldre y puede vese hasta'l 31 d'avientu de 2020