Reanúdense les visites al Pozu Sotón

El Pozu Sotón d'HUNOSA reabre a los turistes con un ambiciosu percorríu mineru esterior como nuevu aliciente. La visita esterior, con numberosos equipamientos mineros desenvueltos polos mesmos guíes del Sotón, xúnese a la tradicional ufierta de convertise en mineru per un día, una esperiencia única nel mundu.
La campaña turística del branu 2020 echa a andar nel Pozu Sotón esti llunes 29 de xunu.
La principal novedá d'esta temporada va ser una ambiciosa ruta minera esterior que percuerre tolos finxos del llabor mineru y que foi preparada polos mesmos guíes del pozu Sotón. Esta visita súmase a la tradicional del interior de la mina, una esperiencia única nel mundu qu'ufierta al turista más aventureru la posibilidá de convertise en mineru per un día.
La ufierta complétase cola visita al Centru d'Esperiencies y Memoria de la Minería, el muséu dedicáu a la hestoria d'HUNOSA.
La visita interior, que dexa al turista vivir l'aventura de ser mineru per un día a más de mediu kilómetru de fondura, va siguir siendo'l platu fuerte del Sotón, pero la principal novedá de la campaña branu 2020 en Sotón ye una amplia visita pelos esteriores del Pozu. Pa ello, los guíes mineros de Sotón diseñaron un percorríu cargáu de finxos mineros. Pertrechaos con cascu, llámpara, guantes y mázcara, los visitantes van empecipiar el percorríu nel almacén y la llampistería, onde se pertrecharán col material mineru, p'afayar depués la hestoria del Pozu y la so arquitectura: los sos dos castilletes, la estructura metálica que los xune o réter y l'edificiu de la casa de máquines y les oficines sindicales, un conxuntu declaráu Bien d'Interés Cultural que constitúi una verdadera catedral de la minería.
Al pie d' esti novedosu percorríu, retómase tamién l'actividá de la que ye la gran atracción del Pozu: la visita interior, convertise en mineru per un día, afayar les coraes de la tierra a casi seiscientos metros de fondura y esfrutar d'una esperiencia única nel mundu.
El Sotón ye la primer mina del mundu qu'abrió les sos galeríes al públicu dexando al visitante, equipáu col so autorrescatador y la so llámpara de mina, llevar a cabu, durante una xornada llaboral, tolos llabores propios de los mineros: picar carbón, abarrenar un frente de galería, viaxar nun tren de personal o percorrer angostes galeríes.
L'interés y la exclusividá de la visita al Sotón foi destacada cola máxima calificación "Anchor Point" pela prestixosa Ruta Europea de Patrimoniu Industrial, ERIH, daqué que convierte'l centru nun referente del turismu industrial n'Europa; y col premiu "Embaxador Turísticu d'Asturies 2017" d' OTEA, patronal asturiana d'hostelería y turismu del Principáu, pola "acertada reconversión d'una instalación minera pa usu turísticu y cultural".
Más información atópesla calcando na semeya del pozu Sotón.