Qué ver nel Muséu Belles Artes d'Asturies

El Muséu Belles Artes d'Asturies además de los fondos qu'espón nos edificios que formen el Muséu presenta hasta el 6 d'avientu: Destacaos. Colección Telefónica.

Destacaos. Colección Telefónica muestra una selección de 61 obres ente pintura, escultura y obra en papel. Pa esta ocasión, axunta dalguna de les pieces más significatives ya icóniques de la colección, non yá pola corriente artística que representa sinón pola importancia y la trescendencia de munchos de los autores que tán presentes: Picasso, Gris, Fernández, Magritte, Delvaux, Chillida o Tàpies, ente otros.
Les pieces escoyíes nun siguen un estrictu percorríu cronolóxicu. Sicasí, dexen trazar una curtia panorámica en redol a dalgún de los capítulos más interesantes asocedíos na hestoria del arte dientro y fora de les nueses fronteres a lo llargo del sieglu XX.
La Colección Telefónica compónse d'un conxuntu de más de 1.000 obres ente pintura, escultura, fotografía y obra en papel. La creación d'esti fondu empecipia nos años 80 del pasáu sieglu col enfotu de promover la reconocencia d'una serie d'artistes españoles poco representaos nos museos estatales. Adquiriéronse entós obres escepcionales de Juan Gris, Tàpies, Chillida, Picasso y Luis Fernández que, a lo llargo de les siguientes dos décades y con propósitos distintos al inicial, ampliáronse y abrieron a otros caminos artísticos.
Destacaos. Colección Telefónica ye una esposición de la Fundación Telefónica que va tar presente nel Muséu de Belles Artes d'Asturies dende'l 24 de setiembre hasta'l 6 d'avientu de 2020 y puede visitase de baldre.

Más información sobre'l Muséu tiénesla calcando na imaxen d'arriba.