Primer Derbi asturianu de la “nueva normalidá” esti domingu a les nueve la nueche nel Estadiu NMR Carlos Tartiere

Primer Derbi asturianu de la "nueva normalidá" esti domingu a les nueve la nueche nel Estadiu NMR Carlos Tartiere . Quinta xornada de LaLiga SmartBank que va ser televisada en directu por Movistar +.

Un alcuentru que va arbitrar el colexáu rinconadense Luis Mario Milla Alvéndiz, que va tar ayudáu nel VAR pol vigués David Pérez Pallás.

Un partíu qu'a priori se presenta desigual, con un Real Uviéu que nun acaba d'atopar racha na competición recibe a un Sporting líder de la categoría.

L'entrenador del equipu carbayón, Cuco Ziganda, asoleyó una llista de convocaos formada por 21 xugadores: : Joan Femenías, Brazâo, Grippo, Edgar, Carlos Hdez, Johannesson, Sangalli, Borja Sánchez, Mujica, Jimmy, Nahuel, Obeng, Viti, Christian Fdez, Cedric, Tejera, Riki, Blanco Leschuk, Mossa, Lucas y Javi Mier.

L'equipu va concentrase dende les 12:30 hores del domingu nel Hotel Silken Monumental hasta la hora del partíu.

Pela so parte, l'entrenador del equipu xixonés, David Gallego, tien les baxes por lesión de Cristian Salvador, Marc Valiente, Pablo Pérez y Pelayo Morilla. Nun hai sancionaos y vuelve tar a disposición Gaspar tres el partíu que cumpliera de sanción.

Al igual que nos partíos que xuega en casa, la convocatoria va conocese cuando l'alliniación, nos prolegómenos del alcuentru.

Según la previsión meteorolóxica, pa la hora del partíu espérense 12 graos de temperatura con cielos cubiertos y riesgu d'agua, con vientu d'unos 10 kilómetros per hora y humedá del 90 per cientu.