Presentación del llibru de Nicolás Sartorius “la nueva anormalidá”, esta tarde a les ocho

Esta tarde en streaming por Youtube (al traviés del canal de Cauce del Nalón), a les 20:00 hores, presentación del llibru de Nicolás Sartorius "la nueva anormalidá", actividá que s'enmarca dientro de la programación d'Estensión Universitaria de la Universidá d'Uviéu.
Tres l'ésitu de La manipulación del llinguaxe, Nicolás Sartorius va presentanos la so última obra, na que trata dalgunes de les espresiones populares del actual llinguaxe aniciáu pola crisis de la Covid-19 nes vertientes económica, social, y política.
¿L'anormalidá yera lo que vivíamos? ¿Por eso volvimos a una nueva normalidá? ¿Tenemos de crear una normalidá distinta? Munches interrogantes, que va tratar de desvelanos y esclarianos cola so presencia virtual al traviés del canal de Cauce del Nalón que puedes siguir calcando na imaxen.
Nicolás Sartorius (San Sebastián, 1938) ye abogáu, políticu y periodista . De familia nobiliaria, foi un activu militante antifranquista,foi unu de los fundadores de CC. OO. y un destacáu miembru del Partíu Comunista d'España (PCE). Deteníu y condergáu en delles ocasiones pola so militancia política mientres la dictadura franquista, foi imputáu pol procesu 1001". Foi miembru del Secretariáu, del Comité Executivu y del Comité Central del PCE.

Participó ,por CC. OO., nes negociaciones de la transición y foi Diputáu per Madrid na II, III ya IV llexislatura pol PCE ya Izquierda Unida, llegando a ser portavoz de la mesma. Darréu xunióse a la corriente Nueva Izquierda que terminó per constituyise en partíu políticu como Partido Democrático de la Nueva Izquierda. Dende l'abandonu d' Izquierda Unida dedicóse a escribir artículos y llibros sobre hestoria contemporanea d'España, la mayoría en relación col periodu de la Transición.

Esta actividá entámala Cauce del Nalón y l'Universidá d'Uviéu, y collaboren el Conceyu de Llangréu y el Club de Prensa de La Nueva España.