Presentación del libro "Èvole: los constructores"
La escritora Tania Huelga Bardo va presentar la so segunda novela de ciencia ficción "Évole: los constructores" na Casa la Xuventú de Sotrondio esti llunes 8 de xunetu a les 20 hores. Trátase de la segunda parte de "Évole", el so primer llibru asoleyáu en 2017.
Además de ser la primer vegada que presente una de les sos noveles nel so pueblu natal,va cuntar cola participación de l'actriz Andrea Holland, que ye una habitual de les actividaes que promueve Tania.
Les sos noveles enmárquense nun planeta alloñáu de la Tierra n'una dómina futura. L'acción de la primer parte avéranos a la vida de la liquidadora Évole y el so sociu Agnos n'una gran población llamada La Ciudá, que recibe la visita inesperada d'unos seres llamaos los Recién Llegaos. Na segunda parte, apocayá publicada, vamos afayar les motivaciones y l'orixe d'estos seres.
Tania Huelga Bardo ye xuna escritora asturiana qu'empezó, como la gran mayoría, con relatos curtios. Foi pasando de xéneru en xéneru y esperimentando colos que más-y gusten: el terror y la ciencia ficción. Col tiempu decidió que tenía de faer una hestoria más complexa, asina que s'embarcó na que sería la so primer novela de ciencia ficción: ÉVOLE; que col tiempu foi faciéndose cada vez más grande hasta qu'acabó convirtiéndose na primer parte d'una saga. Esta primer novela foi publicada por Ediciones Camelot en 2017. Anguaño acaba de publicar la segunda parte: ÉVOLE: LOS CONSTRUCTORES, qu'agora presenta na Casa de la Mocedá de Sotrondio. Al marxe d'esti proyectu sigue escribiendo relatos curtios. Pero, anque camude de xéneru, hai un elementu que siempres ta presente en cada hestoria: la crítica social; de xuru por cuenta de que provién d'una de les zones mineres d'Asturies, onde tuvieron llugar munches revueltes y reivindicaciones obreres. Compaxina la so afición a la llectura y l'escritura col so propiu negociu, y realiza encamientos de ciencia ficción pa la Llibrería Cervantes d'Uviéu.