Presentación de Trassg y la música n'edición dixital

El xueves 12 d'abril a les 20:00 hores nel Centru de Creación Artística Carlos Alvarez-Novoa de La Felguera tendrá llugar la presentación del llibru dixital en llingua asturiana TRASSG Y LA MÚSICA de Xose Ramón Martín Ardines, con versiones en rusu d'Oleg Krotko, n'inglés de Steve Jesson, en portugués d'Oliveira Granja y en francés de Lucía Fernández Suárez.

Trassg ye un personaxe qu'aparez nel branu de 2009 nuna collaboración ente Martín Ardines y la so fía Anxan Martín no qu'entamó a llamase LES AVENTURES DE TRASSG, un cómic por capítulos formáu por delles viñetes  que s'asoleyaben na cabera páxina del   periódicu mensual CIUDAD LINEAL hasta qu'ésti dexó de publicase nel mes d'abril de 2013. Durante esos cuatro años publicáronse 45 capítulos nos que Trassg pasó per estremaes vivencies y reflexones.

En xineru de 2010 apareció una páxina web dedicada al personaxe na que se recoyíen los estremaos capítulos y dellos apartaos con actividaes y xuegos: www.trassg.com. qu'interumpió la so actividá n'avientu de 2012.

N'abril de 2013 la escuela d' Educación Infantil de 0 a 3 años de L'Entregu acoyó la presentación de los cuentos "Trassg el Trasgu", "Trassg y la Primavera" y "Trassg y la Música"dientro les actividaes pa cellebrar el Día del Llibru.

Dempués de cinco años y gracies a la collaboración de dellos collacios apaez esti llibru dixital en cincu idiomes col que Trassg ufierta les sos aventures al traviés de les redes.

Nesta ocasión Trassg fae un percorríu pola historia de la música al traviés de los istrumentos musicales qu'alcuentra nel Muséu de los Istrumentos Musicales de Bruseles.

La edición d'esti llibru forma parte de les actividades de l'Asociación Cultural Al Llau del Llar vinculada a Radio San Martín ,qu'además de programa radiofónicu col mesmu nome tien un magazine dixital nel que pueden atopase entrevistes, noticies y páxines dedicaes al arte, viaxes y deporte: www.alllaudelllar.es