Premiu Muséu Barjola p’artistes plásticos quinta edición
La Conseyería de Cultura, Política Llingüística y Turismu convocó la quinta edición del Premiu Muséu Barjola, dotáu con 5.000 euros pa la obra ganadora, al que van poder concurrir artistes plásticos asturianos o residentes nel Principáu.
La convocatoria va reconocer un proyectu espositivu creáu pa la capiya de La Trinidá, integrada na sede del Muséu Barjola de Xixón. El plazu de presentación de los proyectos termina'l 21 de mayu, y el xuráu va poder declarar ermu'l premiu.
Les bases del certame precisen que la denominación "artista plásticu" nun s'identifica necesariamente con una persona física, sinón que pue referise a un grupu que presente'l proyectu de forma colectiva. Nesti últimu casu, ha designase un representante.
La puesta en marcha del certame partió nel 2017 d'una iniciativa de los responsables d'El Pentágonu del Arte, integráu pol Muséu de Belles Artes, Centru Niemeyer, Llaboral Centru d'Arte, Muséu Barjola y Sala Borrón.
Nes ediciones anteriores, foron gallardonaos Carlos Suárez, por Cita con la historia; Cristina Busto, por Antimapping; el colectivu Offmothers, por Con la casa a cuestas, y Alberto Valverde, que resultó ganador l'añu pasáu col so proyectu La causalidad de lo imposible.