Pompa y circunstancia. Construcciones efímeres nes colecciones fotográfiques del Muséu del Pueblu d'Asturies (1858-2020)

Puede visitase hasta'l 28 de febreru la esposición "Pompa y circunstancia. Construcciones efímeres nes colecciones fotográfiques del Muséu del Pueblu d'Asturies (1858-2020)" nel Muséu del Pueblu d'Asturies de Xixón.

El Muséu del Pueblu d'Asturies caltien un cuantiosu númberu de fotografíes de bien diversa procedencia y autoría que, precisamente por esa amplitú cronolóxica y temática, ye de gran utilidá pa la documentación y l'estudiu de los más variaos aspeutos de la sociedá asturiana dende mediaos del sieglu XIX hasta'l presente.
Gracies a esti patrimoniu fotográficu, en constante crecedera, pudo facese esta esposición que muestra, per primer vegada con visión de conxuntu, la verdadera importancia y dimensión de l'arquitectura efímera n'Asturies.
Una realidá que suel merecer la considerancia de daqué anecdóticu y menor y que, sicasí, equí va poder comprobase que tuvo manifestaciones d'una singular relevancia, tantu dende'l puntu de vista históricu como estéticu.
Ello ye que dalgunes de les primeres fotografíes feches n'Asturies a partir de la década de 1850 tienen precisamente como oxetu dexar testimoniu d'estes arquitectures de vida curtia.
Pa esta esposición, Héctor Blanco escoyó un conxuntu significativu d'imáxenes de Xixón y d'Asturies que muestren dende los pabellones y arcos que se llevantaron n'agostu de 1858 por cuenta de la estancia en Xixón d'Isabel II y la so familia hasta los xarrés arquitectónicos de la cabalgata de Reis Magos del añu pasáu.
Les imáxenes muestren una sorprendente variedá d'arcos de trunfu, de carbón, procesionales, vexetales, pabellones, machones con estatues, torrexones, quioscos lluminosos, musicales, tribunes, altares, baldaquinos, glorietes, casetes de bañu, castiellos ornamentales... Tou ello llevantáu n'ocasiones bien especiales (visites rexes y d'autoridaes diverses, inauguraciones, temporada de branu...) y destináu, por mesma definición, a una efímera esistencia.
Magar estes construcciones son comunes a toa Asturies, nel casu de Xixón constátase una mayor frecuencia nel montaxe d'esti tipu d'estructures, de tipoloxía diversa y calidá munches vegaes sobresaliente. Construcciones llevantaes pa visites institucionales, pa actos oficiales y festexos populares, pa feries comerciales o d'ociu.

Anque concebíes pa sumir, suponen una parte tan llamativa como pocu conocía de la vida local, testimoniu de momentos nos que lo curtiu y lo escepcional (pómpa y circunstancia) precisaron d'una puesta n'escena, en dellos casos, esllumante. Y una cámara fotográfica tuvo ellí pa inmortalizalos.
La esposición con 80 fotografíes y trés litografíes, compleméntase con una proyección de 40 imaxenes dedicaes al Pabellón d'Asturies na Esposición Universal de Sevilla de 1992, proxectáu polos arquiteutos Ramón Muñoz y Antonio Samartín, que formó parte de la esposición universal de la isla de La Cartuxa ente 1992 y 1993, y que foi treslladáu y reedificáu en 1994 nel Muséu del Pueblu d'Asturies.

Acabar de ponese a disposición del públicu, n'internet, l'estudiu y catálogu de la esposición: "Pompa y circunstancia. Construcciones efímeres nes colecciones fotográfiques del Muséu del Pueblu d'Asturies (1858-2020)", que s'espón nel muséu dende abril del añu pasáu y que podrá visitase hasta'l 28 de febreru.