PINTURA EN LAS VENAS.Muséu Barjola
El Muséu Barjola de Xixón acueye la esposición colectiva PINTURA EN LAS VENAS, hasta'l 13 de setiembre.
En pallabres del comisariu y pintor
de la mesma, Juan Fernández Álava: La pintura ye un oficiu tresformador. Cuando pintar conviértese na to vida, ésta preséntase siempres fresca, misteriosa, inabarcable. Pero'l pintor, magar que sabe que nun puede zarrar la vida na tela, tampocu abandona na so aspiración d'arañala y robar un pocu de la so esencia para compartila nel cuadru.
Apriéndese enforma sobre pintura viendo pintura. De la bona y de la mala, porque esta postrera fai que preguntes qué asocede ende por que sía mala... Pero ye la bona la qu'alza l'espíritu.
La esposición que se presenta nel Muséu Barjola de Xixón naz d'esa pasión. Ye un mapa emocional abiertu que pretende seducir al espectador al traviés de la esperiencia estética. Nun ye una muestra de la pintura n'Asturies güei. Habría qu'incluyir a bien de pintores más que mereceríen tar en daqué asina. Lo qu'equí se presenta ye una pequena selección d'obres de diez artistes,persones qu'aborden les sos obres dende l'instintu, conectaes col mesmu impulsu primitivu que siempres operó na pintura, un impulsu que nun se detien nel celebru pa recrease nuna hestoria, sinón que lo tresciende p'aportar a daqué más fondu, más inesplicable, que nun tien que ver con ilustrar la realidá, y que precisamente por non cayer na mera representación, produz más conexones nervioses y neuronales y abre más les respuestes y les interrogantes.
L'espectador va poder ver obres que tomen siete décades. Dende obres de mediaos del sieglu XX, como son les pintures d'Armando Suárez, pasando por algunes pieces de los años 90 de Paco Fernández, hasta obres de principios del sieglu XXI o de factura más recién como son dalgunes de Breza Cecchini o de Assaf Iglesias, d'esti mesmu 2020.
El conxuntu repasa munchos de los xéneros de la Hestoria de la Pintura como son la semeya, el desnudu, el paisaxe, el bodegón... dende distintes miraes, dacuando astractes o figuratives, llíriques o espresionistes, llineales o xestuales, tratando temes tan eternos como la nacencia, la muerte, los suaños, la infancia, los animales, la esperanza, la lluz y la solombra. Estes obres son testimonios de diez vides que converxen güei equí pa mostrar una mirada personal que quier ser compartida. Una fiesta pictórica sobre la fuerza de la pintura.
Una muestra que sirve d'homenaxe tamiénal únicu de los artistes espuestos que dende fai yá tiempu mira dende l'otru llau: Armando Suárez.
Entra nel Muséu calcando nel cartelu.