Nabucco de Giuseppe Verdi inaugura la temporada d'Ópera d'Uviéu

Esti llunes 6 de setiembre entama la setenta y cuatro temporada de la Ópera d'Uviéu con unu de los títulos más populares y representaos de la hestoria de la ópera: Nabucco de Giuseppe Verdi. Nabucco foi'l primer ésitu importante de Verdi. Esta ópera, con trasfondu bíblicu, na que Verdi punxo la so música al serviciu d'ideales patrióticos ye un cantar a la llibertá d'un pueblu primíu: los xudíos, deportaos a Babilonia pol despóticu Nabucodonosor.

Los coros, una auténtica proclama a favor de la llibertá y en contra de la tiranía, consagraron el trunfu de la ópera. El públicu italianu qu'asistió al estrenu en La Scala, tando Milán baxo la dominación austríaca, darréu entendió'l mensaxe y decretó el trunfu de la ópera.
El primer títulu de la temporada va cuntar coles voces de Silvia Dalla Benetta (Abigaille), Antonio Gandía (Ismaele) y Theresa Kronthaler (Fenena), los trés debuten na temporada, y tornen al  escenariu del Campoamor Àngel Òdena (Nabucco) y Simón Orfila (Zaccaria). La Orquesta Sinfónica del Principáu va tar dirixida pol maestru italianu Gianluca Marcianò. Emilio Sagi ye'l responsable escénicu, n'una producción mesma estrenada en 2015. Al frente del Coru Intermezzo, Coru Titular de la Temporada d'Ópera d'Uviéu, el so nuevu director titular: Pablo Mores.

"Nabucco" representaráse los díes 6, 9, 12, 15, 17 y 18 de setiembre y ye'l primer de los cinco montaxes qu'acoyerá'l Teatru Campoamor: "Die Zauberflöte"n'ochobre; "La Bohème" en payares; " Lucrezia Borgia" n'avientu; y " Adriana Lecouvreur" en xineru y febreru.

Tola información sobre esta obra y les demás obres de la temporada operística tiénesla calcanda na imaxen.