Muséu Mundu 3D nel CINN de L'Entregu

El pasáu sábadu 17 de xineru'l inaugurose nel Centru d' Investigación en Nanomateriales y Nanotecnoloxía (CINN)de L'Entregu 'l Muséu Mundu 3D. Esti muséu amuesa un total de 35 pieces, 25 son reproducciones holográfiques d'obres del patrimoniu nacional y asturianu y otres diez correspuenden a obres d'artistes holográficos como 'Crystal Beginning', de Steven Benton; o 'Still Life', de Lon Moo.

Na sala d'holografía aplicada al patrimoniu muéstrense dalgunos de los trabayos que'l grupu d'investigación del CINN llevó a cabu en museos de tol país y que dexen reproducir pieces qu'atesora'l Muséu Arqueolóxicu Nacional al traviés d'hologrames, con una total percepción tridimensional. Amás, amuésense los primeros hologrames dixitales realizaos n'España en grandes formatos, hasta agora imposibles. Así como los primeros hologrames analóxicos realizaos per primer vegada fuera del entornu d'un llaboratoriu.
El muséu distribúyese en trés espacios espositivos, unu dedicáu a la holografía artística, otru qu'amuesa la holografía aplicada al patrimoniu y una tercer zona con audiovisuales y pantalles interactives. Nestes últimes, el visitante va poder conocer los fundamentos de la lluz y los principios sobre los que s'enconta la holografía. Amás, nuna pantalla táctil va poder interactuar y reparar pervalibles pieces del patrimoniu asturianu y nacional dixitalizaes con técniques de fotogrametría.