MUESTRA DE CURTIUMETRAXES DE SAMARTÍN DEL REI AURELIO Sábadu 19 de payares, 19:00 hores
Güei sábadu 19 de noviembre a les 19:00 hores va tener llugar la Gala del Festival de Curtiumetraxes de Samartín del Rei Aurelio nel Teatru Municipal.
Una gala que se presenta como transición ente'l Certame Nacional de Curtiumetraxes Aula 18 celebráu l'añu pasáu y la convocatoria de CINESAN, el Festival de Curtiumetraxes de Samartín del Rei Aurelio que se va celebrar a partir del añu que vien y col que pretende dase continuidá a la promoción y espardimientu del arte cinematográficu na so modalidá de curtiumetraxe.
Na gala d'anguaño van proyetase los curtios ganadores en ficción y animación nos Goya 2016, un curtiumetraxe del director de L'Entregu Asur Fuente y del director asturianu Julio de la Fuente.
El curtiu tituláu "El corredor empobináu por José Luís Montesinos y protagonizáu polos actores Miguel Ángel Jenner y Lluís Altés, que foi premiáu l'añu pasáu nel Certame Aula 18 , vuelve al Teatru de L'Entregu dempués de ser escoyíu en más de 100 festivales nacionales ya internacionales y en consiguiendo'l Goya na categoría de meyor curtiu de ficción del añu. Otros grandes galardones que consiguió esti curtiu son el Premiu Gaudí al meyor curtiu del 2015, el Premiu al meyor curtiumetraxe européu 2015 na SEMINCI o'l Premiu José María Forqué.
"El Corredor" esplica l'alcuentru casual ente un empresariu que lo perdió too y un de los sos antiguos trabayadores, a quién despidió cinco año antes. Trátase d'una metáfora del mundu llaboral en tiempos de crisis y un reflexu de la realidá social que tamos viviendo.
El curtiumetraxe d'animación Alike, de Daniel Martínez Lara y Rafael Cano Méndez, ganador del premiu Goya 2016 al Meyor Curtiumetraxe d'Animación.
Alike ye un curtiumetraxe d'animación, realizáu con Linux y software llibre, que nació como un proyectu personal. Los sos ceadores queríen convidar al espectador a cavilgar alrodiu de la esperiencia de ser padre y sobre cómo se cree que debe educase a los fíos. Nel proyectu collaboraron alumnos y ex alumnos de la escuela dedicada a l'animación 3D de Barcelona, Pepe School Land.
Nuna vida entamanada, Copi ye un padre qu'intenta enseñar el camín correctu al so fíu Pastie. Pero, ¿qué ye lo correcto?
El curtiumetraxe "Quiero ser como Bruce", del autor entreguín Asur Fuente psicólogu y antropólogu social, profesor de la Universidá de Valladolid onde coordina l'Aula de Cine .Autor de delles películes llogró'l Premiu "Tierra Ástur" al Meyor Llargumetraxe Asturianu, sección Gran Angular, nel 52 Festival Internacional de Cine de Xixón cola película "Pela puerta grande".
"Quiero ser como Bruce" trata en clave d'humor dos temes que, a priori, nun dan pa munches sorrises, l'acosu escolar y la situación política actual.
El rodaxe fízose na contorna del Nalón y cuntó cola participación d'actores bien nuevos y non profesionales.
El curtiumetraxe "La cara del diablo" del cineasta asturianu Julio de la Fuente protagonizáu pola televisiva María Patiño y l'actor Ricardo Rodríguez, Curtiumetraxe finalista na edición de fae dos años nel Festival de Cine de Xixón, qu'anguaño volverá proyetase nel Día d'Asturies del mentáu Festival, onde Julio de la Fuente repite como finalista, nesta ocasión col curtiumetraxe tituláu "La clase".
Julio de la Fuente ye un de los cineastes asturianos más galardonáu en festivales nacionales ya internacionales.
"La cara del diablo " rodáu en Somiedu , cunta una cruda hestoria de dominación nuna familia de les brañes somedanes.
La gala, que'l so guión cuerre al cargu de la compañía teatral Higiénico Papel, va ser presentada pol actor Félix Corcuera y mientres la mesma va participar l'Academia de Baille Nonae de L'Entregu.