Michael J. Sandel Premiu Princesa d' Asturies de Ciencies Sociales 2018

El xuráu del Premiu Princesa d'Asturies de Ciencies Sociales 2018, integráu por M.ª Paz Battaner Arias, Adela Cortina Orts, Juan Pablo Fusi Aizpurúa, Mauro Guillén Rodríguez, Silvia Iranzo Gutiérrez, Óscar Loureda Lamas, Ricardo Martí Fluxá, Sami Naїr, Emilio Ontiveros Baeza, Jaime Pérez Renovales, Isaac Querub Caro, Myriam Seco Álvarez y Fernando Vallespín Oña, presidido por Carmen Iglesias Cano, Condesa de Gisbert, faciendo de secretaria Marta Elvira Rojo,  alcuerda conceder el Premiu Princesa d'Asturies de Ciencies Sociales 2018 al catedráticu de Filosofía Michael J. Sandel, unu de los más relevantes intelectuales contemporáneos.
Con esta reconocencia, el xuráu premia una obra exemplar sobre los fundamentos normativos de la democracia lliberal y la defensa tantu de les virtúes públiques como del pluralismu de concepciones del bien nes nueses sociedaes. Amás de la so visión pública de la xusticia, destaca pola crítica de los escesos de la lóxica del mercáu y por promover l'alderique pa la solución de los principales dilemes morales.
Sandel, exemplu del usu públicu de la razón na busca de la verdá, adquirió prestixu mundial por treslladar el so enfoque dialóxicu y deliberativu a un alderique d'ámbitu global. Más allá de les aules y de la lletra impresa, el so métodu de discutiniu socráticu atopó ampliu ecu n'ensame de foros na rede. El xuráu deseya tamién sorrayar la importancia del compromisu ciudadanu colos valores de la democracia y la relevancia de l'argumentación conxunta pa resolver les nueses diferencies como sociedá.