Marcos Granda consigue la segunda estrella Michelín pal restorán marbellí Skina

El pasáu miércoles en Sevilla mientres la gala de presentación de la Guía Michelin d'España y Portugal 2020 el sumiller sotrondín consiguía la segunda estrella pal so restorán Skina en Marbella.

Algamó esta distinción, según les esplicaciones de la guía que lu concede, por sirvir una comida escepcional, tantu por tratase de materia prima de primera, como por ser trabayada de manera sobresaliente, atanante y orixinal en munches ocasiones. Esto va sumáu a la comodidá del establecimientu y al bon serviciu del equipu de sala.

Esta reconocencia añádese a la consiguía l'añu pasáu, nel Pabellón Carlos Lopes de Lisboa, en que'l so restorán madrilanu Clos, ente les estaciones de Cuatro Caminos y Nuevos Ministerios, consiguía una estrella que daba fe del so bon facer y de la calidá del establecimientu .

Marcos Granda inauguró apocayá en Villa Rosario , en Ribesella, el restorán Ayalga col que trai la so calidá culinaria a Asturies y col qu'ensin dulda va siguir consiguiendo ésitos.

Recordamos equí la entrevista a Marcos fecha nel programa Al Llau del Llar del 30 de xineru de 2019 con motivu de la so asistencia al homenaxe a la cocinera Pilar Bernardo , onde mos fala de la so esperiencia y reflexona sobre l'actualidá de la gastronomía y que puedes oyer calcando na semeya.