L'escritor Eloy Fernández Porta xune pallabra y teatru nel Centru Niemeyer

L'escritor y ensayista Eloy Fernández Porta será 'l próximu invitáu del ciclu Pallabra y la so intervención del miércoles 30 de mayu a les 20:00 combinará la lliteratura de la so última obra, "En la confidencia", cola interpretación. Acompañáu por proyeiciones audiovisuales, Porta interpretará 'l primer capítulu d' esta obra, tituláu "Granito del nuevo mundo".

"Granito del nuevo mundo" entama col alcuentru casual, nun garaxe al aire llibre de Carolina del Norte, ente un ventiañeru español recién llegáu y un home sureñu qu'anda a la gueta d'una cura pa la enfermedá de la so muyer. Desendolcáu en forma de pieza teatral breve, e illustráu con una selección d' obres d' arte que tien como base la gama cromática del blancu, la obra arranca como un monólogu dramáticu y, nun xiru imprevistu, camúdase nuna sátira vibrante alrodiu del choque cultural, nel que l' autor desdóblase en dos personaxes, Suicide y Western Culture, que, enzarzaos en desafíos y arrastros, faen un conciliu delles vegaes violentu, a ratos cómicu, punteáu por escenes llíriques y un momentu musical, nel que van axustando cuentes el Vieyu Mundu y el Nuevu.

Eloy Fernández Porta (Barcelona, 1974) ye Doctor en Humanidaes pola Universitat Pompeu Fabra y profesor de Teoríes de la Cultura. La so serie d' artículos sobre arte Nubada en prosa edítase por Jot Down y Núvol. Desendolcó los dúos de spoken word "Afterpop Fernández & Fernández" (con Agustín Fernández Mallo) y "Mainstream" (con Jose Roselló). N' Anagrama asoleyó los llibros de crítica cultural "Afterpop", "Homo Sampler", "€RO$", "Emociónese así", "En la confidencia" y, próximamente, na coleición en catalán de la editorial, "L'Art de Fer-Ne Un Gra Massa". Galardonada col Premiu Extraordinariu de Doctoráu, el Premiu Anagrama y el Premiu Ciudá de Barcelona, la so obra ensayística foi tornada al inglés, francés y portugués.