Les Cebolles Rellenes en L'Entregu

Esti fin de selmana L'Entregu celebra les Fiestes Gastronómiques de Les Cebolles Rellenes, declaraes d'Interés Turísticu Rexonal pol Principáu d'Asturies, celebraranse del 29 de payares al 2 d'avientu nuna ventena de chigres, sidreríes y restoranes de la localidá y la contorna.
La hostelería local va ufiertar, na xinta y la cena, el tradicional menú compuestu poles clásiques cebolles rellenes de bonitu, ración de callos y casadielles, regáu colos meyores caldos de la tierra. Siguiendo la llínea d'años anteriores ta previstu espachar del orde de les 12.000 raciones de cebolles, a razón de 600 por establecimientu.
El menú completu, incluyendo la bebida, tará ente los 23 y los 27 euros, mientres que la ración individual de cebolles puede costar unos 12 euros, dependiendo de cada establecimientu, yá que cada local afita'l so propiu preciu. Dada la gran afluencia de públicu encamiéntase acutar mesa, consultando'l directoriu de restoranes : https://www.smra.org/chigres
Les xornaes gastronómiques van cuntar con una programación cultural y festivo paralela, al cargu de la nueva Asociación Cebolles Rellenes de L'Entregu, con participación d'hosteleros locales, y la collaboración del Conceyu. Ente los actos previstos figura pa la xornada del vienres 29, el pregón, la celebración del Día de la Canción y el Folclor, el concursu gastronómicu de cebolles rellenes p'aficionaos y profesionales, l' actividá solidaria de l'Asociación Rey Aurelio, actuación de la banda de música y verbena col grupu Beatriz y DJ Pana.
El sábadu 30 d'avientu, pasacais, carrera de cintes a caballu, amagüestu na carpa de la fiesta, representación de la obra de teatro "Hambre", de la compañía La Líquida, y actuación na verbena cola orquesta Waykas Family y DJ Pana. Al otru día, domingu día 1 d'avientu, xornada dedicada a los neños y neñes con xuegos tradicionales a lo llargo tol día nel parque de La Llaguna y "batalla de gallos" p'adolescentes.