"Joan Ponç´: la esencia de lo máxico" nel Centru Niemeyer hasta'l 10 de xineru de 2022
La esposición Joan Ponç: la esencia de lo máxico, que podrá vese nel Centru Niemeyer del 25 de xunu al 10 de xineru de 2022, ufierta al gran públicu la oportunidá d'afayar la obra surrealista, innovadora y máxica d'un xeniu de la pintura al traviés de les grandes etapes de la so producción pictórica.
La muestra, comisariada por Alicia Vallina, plantégase como un percorríu por trés grandes secciones que tomen la so creación y evolución estilística y temática dende los sos entamos en 1940, pasando pola década de 1970 y los últimos años de producción, hasta'l so fallecimientu en 1984.
Olios, acuareles, dibuxos, aguafuertes y fotografíes que tomen cuatro décades de creación artística introducen al públicu nel singular mundu d'un creador visionariu.
- Coetáneu d'autores como Dalí, Tàpies, Miró o Brossa, espunxo en vida en Nueva York, París, São Paulo, Tokio o Madrid y les sos obres atópense en destacaos museos.
- La esposición cunta cola collaboración del Muséu d'Arte Contemporáneu de Barcelona, Universidá d'Uviéu y RTVE , el sofitu de la Fundación Banco Sabadell y l'empresa asturiana Fidelitas Asesores S. A. P.
