Javier Villanueva

Javier Villanueva dexónos esti vienres 7 de mayu, pero la so obra y les sos enseñances van acompañanos siempre.

Javier Villanueva, escritor, dramaturgu y sobre too amigu, dexa un espaciu difícil de  sustituyir pues además de la so obra y el relatu de les sos vivencies , la hestoria cultural de los caberos años d'Asturies pierde a unu de los sos más activos protagonistes.

Nos años 70 crea los grupos de teatru independiente Caterma, Koturno y Tespis.

Mediaos los años 70 coordina les páxines infantiles "El Trasgu" del periódicu La Voz de Asturias . Y nos años 80 dirixe'l Teatru Universitariu de la Universidá d'Uviéu.

En 1988 estrena la obra "Cristos para una cruz", col grupo Teatro Pausa , col que fae dellos montaxes y además de la docencia nel colexu Los Dominicos d'Uviéu, da clases de teatru y dirixe grupos aficionaos. Una intensa actividá cola que dexa discípulos y amigos a lo llargo d'Asturies.

Durante los últimos años además de dedicar toles sos fuerces a construyir un teatru na so casa,  estrenó delles obres na bocamina de Solvay n'homenaxe a los mineros, a los sos vecinos de Llieres y a la so familia. Obres con fuerte carga social y de reflexón sobre'l comportamientu humanu , como la "Princesa de las noches blancas" cola que ganó'l Premiu Xovellanos de TVE n' Asturies en 1988. Tamién tuvo otros reconocimientos como'l Premiu de Teatro Antonio Buero Vallejo Ciudad de Guadalajara del añu 2005.

Con Teatro Pausa representó delles obres: "Otra Casa, Otra Bernarda", "El retrete","ESTAMPAS DE TABERNUCHAS.Primeros chigres mineros", "Una petición de mano muy singular","Cuando el lobo se enamoró de caperucita"...

Javier Villanueva yera amigu y en delles ocasiones collaboró con Al Llau del Llar y Radio San Martín, una profunda tristeza nos enllena que solo superaremos col recuerdu de los bonos momentos compartíos .

El nuesu más candial abrazu y ánimu a la familia.

¡Hasta siempre amigu y maestru!