Inauguración de la esposición del III PREMIU MUSÉU BARJOLA, Dosis Mínimas del Colectivu OFFMOTHERS,

El Colectivu Offmothers ta constituyíu por un grupu d'artistes, sociólogues, filósofes y músiques asturianes: Susana Carro, Elena de la Puente, Natalia Pastor, Roxana Popelka, Gema Ramos y Eugenia Tejón, qu'analicen, denuncien ya interpreten non yá la esperiencia de ser madre y artista, sinón tamién la maternidá como categoría discursiva y construcción cultural.
Offmothers arrinca la so andadura'l mes d'agostu del añu 2014 sol amparu d'una residencia artística entamada nel espaciu de trabayu de Paraisu Rural Estendíu. Dende entós hasta agora la so producción artística foi bien variada, por casu destaquen dos residencies artístiques en Llaboral Centru d'Arte y Creación Industrial que dan como frutu dos instalaciones : Pájaros en la Cabeza (marzu de 2016) con oxetu de cavilgar sobro l'ambivalencia emocional presente na maternidá y Casa Tomada (mayu del 2018) onde tres la llectura crítica del llar el Colectivu plantega alternatives al mesmu convirtiendo'l llar en casa y la casa n'espaciu propiu. La pieza sonora Acordamos un Viaje Perfecto (setiembre del 2016) realizada nel contestu de la residencia artística PACA (Proyectos Artísticos Casa Antonino) que describía'l procesu de crianza como un constante fluyir de l'harmonía al caos. La instalación Animales Domésticos (setiembre de 2017), esposición financiada gracies a l'ayuda pa la producción artística concedida pola Fundación Municipal de Cultura del Conceyu de Xixón qu'empecipia un procesu de reflexón sobro'l llar como ámbitu pa la doma de les muyeres. La esposición de dibuxos Incendios (marzu de 2019) onde'l Colectivu ye convidáu a inaugurar l'espaciu Mieres Centru Cultural, amuesa na que se presenta la maternidá dende l'exerciciu de la mesma, como esperiencia y, por tanto, bien alloñada a la maternidá como institución.
Con esti bagaxe, n'agostu de 2019 el Colectivu Offmothers gana l'III Premiu Muséu Barjola y por ello la instalación que se presenta ye consecuencia de dichu galardón. Dosis mínimas ye'l títulu d'esta nueva propuesta, un proyectu interdisciplinar na que'l Colectivu abandona'l so llinguaxe didácticu pa entamar un proyectu qu'apela a la intuición: ufiértense signos que, como nuna partitura, van atopar intérpretes virtuosos o interpretaciones confuses. En Dosis mínimas coesisten el silenciu de l'ama de casa y el ruiu del ociu ayenu, la enfermedá que nun tien nome y el berru de quien la denuncia, los malestares sociales trataos como patoloxíes individuales y les catarsis sociales convertíes en patoloxíes individuales. Soluciones médiques errónees pa un problema políticu. Media pastilla y Dosis mínimes pa non estresarse, pa tar en tou y ser tou: madre, cocinera, oficinista llimpiadora, educadora, entamadora y siempres cuidadora y dispuesta a aplazar cualquier proyectu personal. Ociu, fadiu, galdidura... "Dosis mínimas ye tamién un prospeutu médicu que nos encamienta ponenos nuna situación de desequilibriu: tenéis que perdevos y, probablemente, con nós dientro".