"In memóriam" de José Luís Campal

Esti miércoles, 19 de mayu, inaugúrase n'Uviéu la primer esposición retrospectiva del trabayu con grafitu de José Luis Campal Muñiz tres el so fallecimientu'l pasáu 7 d'abril. La muestra recueye col títulu de "In memóriam" la so producción de 1980 a 2018. Esta trentena de pieces van poder esfrutase hasta'l próximu 6 de xunu en Manglar Ecosistema Cultural, un local allugáu nel númberu 14 de la cai Obispu Martínez Vigil, en plenu cascu históricu d'Uviéu, y que se define como un espaciu de confluencia cultural y social. Los horarios de visita son de miércoles a domingu, dende les 12 del mediudía hasta les 11 la nueche.

José Luis Campal Muñiz (Turón, 1934 - La Pola Llaviana, 2021). Conocíu na so redolada como "Campal", esti llavianés descubre na so mocedá l'arte gráficu de forma totalmente autodidacta y conviértelu n'una pasión que lu acompañará a lo llargo de tola so vida. Sicasí, la so faceta como dibuxante nun ye bien prolífica mientres los primeros años -de los que se caltienen solamente delles semeyes que destaquen pol so realismu y una gran maña nel empléu del lápiz de grafitu- yá que dedicó gran parte de la so vida profesional a la rotulación, oficiu que compaxinó durante cuarenta años col so trabayu na empresa d'autobuses "El Carbonero".

Como rotulista, foi autor de la imaxe gráfica de munchos negocios y eventos de la cuenca del Nalón y son innumberables los cartelos publicitarios, vehículos comerciales, murales y lletreros retulaos por Campal a lo llargo la segunda metá del sieglu pasáu, emplegando una depurada técnica artística bien personal. Ye nos postreros venticinco años de la so vida cuando retoma de forma entusiasta la so afición pol dibuxu y muestra tola so capacidá artística. Magar ente los sos trabayos atópense paisaxes y escenes cotidianes fechos a tinta, xunto a unes doscientes semeyes de personaxes famosos y anónimos, familiares, amigos y una colección de desnudos dibuxaos con lápiz de grafitu. Por cuenta del so calter modestu y discretu, Campal solo esibe públicamente los sos dibuxos en cuatro ocasiones y siempre n'esposiciones de calter local, nes que nunca viende les sos obres; siempre prefier regalar los sos trabayos o caltenelos como alcordanza de los bonos momentos que-y apurre'l placer de dibuxar.
"In memóriam" ye una muestra del talentu de Campal, un tributu a un artista desconocíu fora de la so redolada qu'esfrutó del dibuxu hasta los últimos díes de la so vida.