Fred Vargas Premiu Princesa d' Asturies de les Lletres 2018

El Xuráu del Premiu Princesa d' Asturies de les Lletres 2018, integráu por Xosé Ballesteros Rey, Blanca Berasátegui, Luis Alberto de Cuenca, Lola Larumbe Doral, Antonio Lucas, Ángeles Mora, Leonardo Padura, Laura Revuelta Sanjurjo, Carmen Riera, Fernando Rodríguez Lafuente, Ana Santos, Sergio Vila-Sanjuán, Juan Villoro, presidíu por Darío Villanueva y actuando como secretariu José Luis García Delgado, concede'l Premiu Princesa d' Asturies de les Lletres 2018 a la escritora francesa Fred Vargas (Frédérique Audoin-Rouzeau).

Formada como arqueozoóloga, entiende la sociedá como un misteriosu y complexu ecusistema. Na so obra narrativa destaca la orixinalidá de les sos trames, l' ironía cola que describe a los sos personaxes, la profunda carga cultural y la desbordante imaxinación, qu' abre al lletor horizontes lliterarios inéditos.

La so escritura combina l' intriga, l' acción y la reflexón con un ritmu qu'alcuerda la musicalidá de la bona prosa en francés. En cauna de les sos noveles la Hestoria apaez como metáfora d' un presente desconcertante. El vaivén del tiempu, la revelación del Mal conxúguense nuna sólida arquitectura lliteraria, con un fondu inquietante que, pa goce del lletor, resuélvese siempre como un desafíu a la lóxica. Fred Vargas encarna, por too ello, la revitalización d'un xénero, la novela d' intriga, al qu'añadió brillantemente, novedoses pieces, atmósferes y espacios hasta componer una obra de proyección universal.